euskalkultura.eus

Madril, Espainia. Beti-Jai salbatzeko ekimen herritarra pozik agertu da aurrera daraman ekitaldian azken astean eman diren pausoekin. Orain hilabete batzuk martxan jarri zuten sarean sinadurak biltzeko kanpainak, 4000 lortu ditu dagoeneko, eta iragan aste honetan Madrilgo Ondare Historikoaren zuzendaria den Jose Luis Martínez-Almeidarekin bildu dira.

Frontoia 1893. urtean diseinatu zuen Joaquin Rucoba arkitektoak eta munduan dagoen neomudejar estiloko frontoi bakarra da. Berezitasun arkitektoniko hau dela eta, 'Kultura Ondasun' izendatua izan zen 1977 eta 1991. urteetan eta hori dela eta hain zuzen ere Martínez-Almeidak oroitarazi du ezin dela bota, ezin dela bertan bestelako eraikuntzarik egin eta ezin dela bere balore historikoa kaltetu dezakeen aldaketarik ere ez. Plataformak azaldu dio, bere aldetik, frontoia auzoko bizilagunentzat nahi dutela, kirol eta kultur gune bezala, eta euren esanetan, proposamena ona iruditu zaio Martínez-Almeidari.

Espekulazio arriskutik atera eta herri erabilera ematea

Zuzendariaren esanetan, oraintxe frontoian egiten ari diren lanak bere departamentutik eskatu zaizkio jabeari erikuntzaren egoera okerragora joan ez dadin. Gaineratu du bertan bestelako lan batzuk egiteko baimenak eskatu zirela bere momentuan eta hauek ez zirela baimendu, eraikuntzaren egitura ezin daitekeelako inolaz aldatu. Hala ere, esan du, Ondare Historikotik gertutik jarraituko dituztela frontoiaren inguruan eta bertan egiten diren lanak, arazorik sor ez dadin.

Herri mugimenduko kideak, euren aldetik, pozik azaldu dira batzarrean entzundakoarekin, arkitekturaren harribitxi hau berriz ere martxan ikus daitekeelakoan. Beti-Jai salbatzeko Plataformak, frontoia espekulazio arriskuan ikusten zuen hirian duen kokapen estrategikoa dela eta. Ez da ahaztu behar, Beti-Jai Castellana pasealekutik 50 metrora dagoela. Hala ere, oraindik ikusteke daude Madrilgo Komunitateak zein Udaletxeak Beti-Jai frontoiarekiko hartuko dituzten neurriak. Beti-Jai salbatu nahi duen ekimen hiritarrak beha segituko duela adierazi du.

-Plataformaren webgunea: www.betijai.blogspot.com