euskalkultura.eus

Urdazubi, Nafarroa. Euskal Herrian bizi diren euskal-txiletarrak Urdazubiko Ikaburua jatxetean bildu ziren irailaren 18an, Txileren eguna eta Indepentziaren bigarren mendeurrena ospatzeko. Txileko Santiagoko Euskal Etxearen Berriketari buletin digitalean plazaratu dituzte antolatzaileek bazkariaren argazkiak, eta gu haiekin harremantean jarri gara bilkuraren berri izateko. Hirugarren edizioa izan da aurtengoa eta nahiz eta partaide gehienak lapurtarrak izan, Euskal Herri osoko euskal-txiletarrei irekia da.

"Elgarretaratze honetan denetarik dago, Txiletik etorritako jendea, Txilen bizi izandako jendea... Jende guztiak badaukate erlazio bat (familia gehienetan) Txilerekin eta gehienak bizi dira Iparraldean (Lapurdin). Gehienak ezagutzen degu elgar, honela urtero saiatzen gara jendea bilatzen gehiago izaiteko ospatzeko hori. Bakoitzak bere esperientzia kondatzen du eta denon artean momentu goxo bat pasatzen degu egun osoan", azaltzen du Bixente Larrek.

 [Urdazubiko paraje eder honetan egin zuten bazkaria (argazkia Bixente Larre)]

 [Ikurrinak eta Txileko banderak egin zieten ongi etorria bazkarira bildu ziren euskal txiletarrei (argazkia Bixente Larre)]

[Bazkaldu aurretik pisco-sour, Txileko aperitif tipikoa dastatuz, agurtu zuten elkar (argazkia Bixente Larre)]

Mattin Aycaguer izan zen bazkari hauek antolatzeko ideia izan zuena eta berak antolatu zituen lehendabiziko biak. Aurten lekukoa Alberto Choribit eta Bixente Larre hazpandarrek hartu dute. Urtero legez, bazkaria Mattin Arrieta saratarrak Urdazubin duen Ikaburua jatetxean egin dute. Bazkalostean Txileko kantu eta dantzekin ospatu zuten Independentziaren bigarren mendeurrena.

 [Bazkalostean kantari (argazkia Bixente Larre)]

 [Euskal-txiletar belaunaldi berriak ere bazkarian izan ziren (argazkia Bixente Larre)]

 [Txileko 'cueca' dantza tipikoa dantzatzen bukatu zuten batzuk (argazkia Bixente Larre)]