Lapridako Lagunen Etxea-ko lagunek hiriaren 123. urtemugako ospakizunetan hartu zuten parte

Urtero bezala, 2012 honetan ere Lapridako Lagunen Etxea-ko kideek Buenos Aires probintziako hiri honen sortze-urtemuga ospatzeko deiari baietz esan eta bertako euskaldunen ordezkari aritu ziren. Mota askotako ekintzak burutu ziren 123. urteurreneko jaialdian, tartean erakusketak, kabalkada, elizkizunak eta ikuskizunak, batzuk aipatzearren solilik. Bertoko euskal gizataldea presente izan zen ekitaldi guztietan, argentinae bandera eta ikurrina eramanez. Bestalde, Lagunen Etxea-ko kide den Maria Esther Arrondok jakinarazi digu abian dagoela jadanik Eusko Txokoa Liburutegiak bultzatutako lehiaketa. X. edizio honetan ‘Argentinako Banderaren bigarren mendeurrena’ da gaia.

Laprida, Argentina. Bi eguneko jaialdia gauzatu zen joan den irailean Laprida hirian izen bereko partidoaren 123. urtemuga ospatze aldera. Alde batetik, larunbatean, 15ean, hainbat erakundek muntatutako standak eskaini zitzaizkion publikoari. Suak ere piztu ziren eta artisauen erakusketa inauguratu zen. Arratsaldean Lapridako 2012ko Erregina aukeratzeko desfilea egin zen eta horren ostean, folklore, tango eta rock ikuskizuna eskaini zitzaien bildutako lagun guztiei.

Biharamunean, meza eman zuen apezpikuak eta elizkizunak bukatzean ekitaldi ofizialak burutu ziren Pedro Pereyra Plazan. Bertan Azul herriko Erregimentuaren Bandak jo zuen. Zeremoniarekin bukatzeko, ordezkaritzak, erakunde eta kolektibitate eta karrozak irten ziren plazatik kabalkadan. Larunbateko programa ere musika ikuskizun batekin bukatu zen.

[Urtemugaren baitan, euskal etxeko kideek herriko dendariei euren erakuslehioak apaintzen lagundu zieten (argazkiaEE)]

Urtero bezala, euskal gizataldearen ordezkariek euren ekarpena egin zioten herriko jaiari. Euskal etxeko sukaldariek --Alba Galetti, Monica Azpiazu, Josefa eta Teresa Larralde, Susana Igartua eta Santiago Larraldek hain zuzen-- tripakiak Bizkaiko erara prestatu zituzten komunitatearekin partekatzeko. Bestetik, Maria Ester Arrondo Eusko Txokoa liburutegiko arduradunak ‘Urrezko liburua’ eta Euskal Herriko mapak aurkeztu zituen. Cnel. Pringles herriko euskal etxeko lagun batzuk bertaratu ziren Lapridara jaian parte hartzera, tartean Yanina Salaberry, Lagunen Etxea-ko dantza irakaslea, eta bere familia.

[Lan eta lan, euskal etxeko sukaldariek tripakiak Bizkaiko erara prestatu zituzten komunitatearekin partekatzeko (argazkiaEE)]

Banderaren bigarren mendeurreneko lehiaketa

Beste alde batetik, Eusko Txokoa Liburutegitik jakinarazi digute abian dela dagoeneko aurtengo lehiaketa. Argentinako banderaren sorreraren bigarren mendeurrenean, banderak berak --Argentinakoa zein ikurrina-- izango dira gaiak.

Hiru kategoriatan bereiziko dira partaideak: haurrak (10 eta 12 urte artekoak), nerabeak (13 eta 18 artekoak) eta helduak. Erantzunak bidaltzeko epea abenduaren 3an bukatuko da eta mearrondo@laprida.net edo Av. Pedro Pereyra 1418 (7414) Laprida Pcia. Buenos Aires, Argentina helbideetara bidali behar dira. Sariak liburuak izango dira.

Hona galdera sorta:

1- Argentinako bandera eta ikurrinaren sortzaileen izenak
2- Noiz eta non altxatu zen lehendabizikoz Argentinako bandera? Eta ikurriña?
3- Koloreen esanahiak (urdin argia, zuria, horia / gorria, berdea, zuria)
4- Zein gobernurekin onartu zituzten ikur?
5- Banderen eguneko datak

euskalkultura.eus

Albisteak

Lapridako Lagunen Etxea-ko lagunek hiriaren 123. urtemugako ospakizunetan hartu zuten parte

Erlazionatutakoak

Irakurrienak

Azken komentarioak