euskalkultura.eus

La Plata, Argentina. Atzo abiatu zen La Platako Unibertsitate Nazionalean bertako Giza Zientzien Fakultateak antolatu duen Euskal Historia, Kultura eta Hizkuntza Mintegia. Doako ikastaro honek euskal kulturaren hainbat alderdi ezagutzeko aukera emango die parte-hartzaileei eta klaseak astelehenero emango dira, arratsaldeko 20:00tatik 22:00tara Hall Nagusiko 102. ikasgelan. Ikastaroan parte har dezakete gaian interesa duten unibertsitateko ikasleek zein publiko orokorrak.

Mintegia unibertsitateak eskaintzen duen Euskal Hizkuntza eta Kultura irakurlegoaz apartekoa da. Idurre Lekuona irakurlea mintegian ere irakasle izango da, baina batetik bestera aldea dagoela azaldu dio EuskalKultura.com-i: batetik, mintegia laburragoa da (irailetik abendua arte) eta, hori dela eta hain zuzen, urte osoko ikastaroa egin ezin dutenentzat aukera polita izan daiteke; bestetik, ikastaroan ez da zuzenean euskera irakatsiko, nahiz eta euskal hizkuntzari buruzko informazioa emango den (irakurlegoan irakasten baita euskera).

Mintegiak hiru atal izango ditu: lehena, Euskal Herriaren geografia, historia eta politikari buruzkoa; bigarrena, euskarari buruzkoa (jatorria, bilakaera, egoera eta ezaugarri bereziak); azkena, "kultur adierazpenei buruzkoa izango da", azaldu du Lekuonak, "eta bertan, besteak beste, Euskal Herriko genero sistemaz, baserriaz, kantugintzaz eta abarrez hitz egingo dugu".

-Ikastaroari buruzko informazio gehiago nahi izanez gero, idatzi e-maila hona: lectorado.euskera@presi.unlp.edu.ar edo jo webgune honetara (bertan eskura daiteke mintegian izena emateko inprimakia)