euskalkultura.eus

New Orleans, Estatu Batuak. Lau urte joan dira 2005eko abuztuan Katrina hurakanak AEBetako Louisiana aldea bortizki kolpatu eta ingurua hondamendi eremu bihurtuz New Orleans uren azpian utzi, guztia hondatu eta biztanleen bizitza erabat aldatu zuenetik, ofizialki gutxienez 1.836 hildako eraginez, 705 desagertutako eta milioika kaltetu Louisiana eta ondoko estatuetan.

Hiriak zeukan euskal komunitateari buruz, bertako LABASCO (Louisiana Basque Society and Cultural Organization) bertan behera gelditu zen epe baterako, bere kideek beste premia batzuei erantzun behar izan baitzieten. 2007ko martxoaan itzuli ziren bizitza publikora, izan ere 1964tik Louisianan bizi den Jose Maria Cundik artista getxoztarraren erakusketa baten aitzakian.

Orain, elkartearekin eta bertako euskal lanari bultzada emango dion onespena heldu zaie Louisianako Estatuaren aldetik, LABASCO 'etekin asmorik gabeko erakunde' (non profit organization) gisa onartu berri baitu, Michel-Antoine Goitia-Nicolas berak EuskalKultura.com-i adierazi dionez. Elkarteak, aldi berean, sinbologiaz beteriko bere bandera aurkeztu du, euskaldunek kanadar, iparramerikar, akadiar, karibear, kreol eta Louisianako historia eta kulturan garatu duten zeregin esanguratsua azpimarratuz.