euskalkultura.eus

euskal diaspora eta kultura

Albisteak rss

1936ko erbesteari buruzko mahai inguru batekin bukatuko da bihar Donostian Exilioaren X. Kongresua

2009/10/08

Ezkerrean, Jose Angel Ascunce, Hamaikabide elkarteko presidentea; eskuinean Federico Alvarez, Donostiako Pasealeku Berrian
Ezkerrean, Jose Angel Ascunce, Hamaikabide elkarteko presidentea; eskuinean Federico Alvarez, Donostiako Pasealeku Berrian

PUBLIZITATEA

1936ko oroitzapenei buruzko mahai inguru batek markatuko du bihar Donostian, aste honetan zehar Amerika eta Europako 68 irakasle eta aditu partaide Bilbon eta Donostian 'Exilioa lehenengo pertsonan' lelopean garatu den Nazioarteko Kongresuaren amaiera. Hamaikabide elkarteak eta Deustuko Unibertsitateak antolaturik, urtero deitzen den kongresu honen hamargarren edizioak omenaldi berezia eskaini nahi izan dio aurten Federiko Alvarez (Donostia, 1927) idazle eta irakasleari, ohorezko makila bat emanez. Alvarez bera, Arantza Amezaga eta Ramon de la Sotarekin batera izango dira Jose Angel Ascunce moderatzaile izango duen mahai inguruko solaskide, bihar Gipuzkoako Foru Aldundiaren Jauregian, Jargiaren Aretoan, sarrera libre.

Donostia, Gipuzkoa. Kongresuari azkena ipiniko dion mahai-inguruan erbesteko bizipenetan aberatsak diren hiru pertsona izango dira solaskide. Hasteko, Federiko Alvarez Arregi irakasle donostiarra, Alde Zaharrean jaioa. Alvarezek Kuban eta Mexikon eman ditu urte gehienak garrantzi handiko karguetan lan eginez, besteak beste, Mexiko DFko Unibertsitate Autonomoan eta Fondo de Cultura Economica argitaletxean. Aurtengo Kongresuan omenaldia egin zaio eta Hamaika Bide Elkarteko partaideek ohorezko makila eman diote. Bere hitzaldiaren izenburua “Memorias del exilio” izango da.

Bigarren hizlaria Arantza Amezaga idazle ezaguna izango da. Arantza Amezaga Iribarren, berez, ez da erbesteratutako pertsona izan, Uruguain jaio baitzen, eta beraz euskal Diasporako alaba kontsidera daiteke. Bere aita Bizente Amezaga ospetsua zen eta gertutik ezagutu zuen haren ibilbidea, baita ere Irujotarren familiarena, Peio Irujo Elizalderekin ezkondu baitzen Arantza. Jardunaldi hauetan bere azken liburua aurkeztu du, Crónicas de Montevideo, non garai horietako oroimenak bildu dituen. Bere hitzaldiari “La expatriación como realidad emocional y política” jarri dio izenburu.

Arratsaldeko zazpietan, sarrera libre

Hirugarren hizlaria Ramon de la Sota izango da. De la Sota familiako semea, gertutik ezagutu ditu erbestea eta erbesteko gizon-emakumeak. Biharko saioan bere osaba Manu de la Sotari buruz hitz egingo du. Manu de la Sota garrantzi handiko pertsonaia izan zen gerraosteko urteetan, bereziki New York-eko Euskal Ordezkaritzan, Agirre lehendakariaren kolaboratzaile zuzen gisa. Bere hitzaldiaren izenburua, “Manu de la Sota y otros recuerdos del exilio”.

Mahai-ingurua Jose Angel Ascunce irakasleak aurkeztuko du. Ascunce, hamarnaka libururen egilea da eta erbesteko gaietan Euskal Herriko aditu nagusietariko bat da.

Saioa arratsaldeko 19:00etan hasiko da, Donostian, Gipuzkoako Foru Aldundiaren Jauregian, Jargiaren Aretoan, sarrera libre.

 



« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia