Karmele Jaio idazlea Guadalajarako Liburu Azokan da gaurtik aurrera, Etxepare Institutuaren sostenguarekin

2013/12/05

Karmele Jaio idazlea (argazkia Etxepareinstitutua.net)

PUBLIZITATEA

Etxepare Euskal Institutuak jakinarazi duenez, euskal literatura aurten ere Guadalajarako Nazioarteko Liburu Azokan izango da eta euskal editoreek standa jarri dute ferian. Gaurtik hasita, bertan ari dira sustapen lanetan Etxepareko Euskara zuzendari Mari Jose Olaziregi eta Karmele Jaio idazlea. Abenduaren 9tik aurrera Mexiko DFn izango da Jaio eta han hitzaldiak eskainiko ditu UNAM unibertsitatean eta Centro de Creación Literaria Xavier Villaurrutia kultur gunean, besteak beste.

Guadalajara, Mexiko. Aurten ere Etxepare Euskal Institutuak euskal literatura zabaltzeko ahalegina sustatuko du Guadalajarako Nazioarteko Liburu Azokan, Latinamerikako liburugintza arloko topaketa nagusian. Horretarako euskal editoreek standa izango dute azokan, bertan euren produktuen berri eman ahal izateko. Horrez gain, gaur eta bihar azokan izango dira Karmele Jaio idazlea eta Etxepareko Euskara zuzendari Mari Jose Olaziregi, hainbat topaketa eta hitzaldietan parte hartzeko.

Astelehenean, abenduaren 9an, Mexiko DFn izango dira Jaio eta Olaziregi eta han Etxepareren Euskara eta Euskal Kultura irakurlegoetako ikasleekin topaketak egingo dituzte. Era berean, literaturari buruzko mahainguru batean eta irratsaio batean parte hartuko dute biek.

Egitarau osoa, hemen.