euskalkultura.eus

Donostia, Gipuzkoa. Euskal Herritar Unibertsala sariak euskal edo jatorri euskalduna duten pertsona zein elkarteak saritzen ditu euren lanaren bidez Euskal Herriaren irudia atzerrian eskaintzen dutelako. Juan Mari Arzakek euskal gastronomia garai berrietara moldatu eta munduko berritzaileenen artean kokatu duela iritzita sariaren epaimahaiak aurtengo saria sukaldari gipuzkoarrari ematea erabaki du.

Donostiarra, Euskal Herrian bere sukaldaritza lanak erakusteaz gain, Diasporan ere lan egin du azken urteetan. 2006ko urrian, esaterako, Mexikoko Zona Rosa eta Pedregaleko Tezka jatetxeetan aritu zen aholkulari gisa bere zigilua jarriz. Bestalde, Mexikoko zenbait euskal sukaldarirekin harremanetan jarri da 'Sukal Leku' egitasmoan parte har dezaten. Euskal sukaldaritza munduko gastronomiaren lehen postuan kokatzeko helburua duen proiektu honetako lehendakaria da Arzak eta fundazioa datozen hilabeteetan Diasporako beste zenbait sukaldarirekin jarriko da harremanetan.

Sari ugari bere ibilbidean

Sukaldaria 'Arzak' jatetxean hasi zen lanean 1966. urtean, 1897an aitona-amonek Donostiako Mirakruz gainean altxa zuten eraikin batean. Bere ibilbide profesionalean sari eta aitorpen ugari jaso ditu bere gastronomia lanarengatik. 34 urte zituela bere lehenengo saria jaso zuen. Hauek dira jasotako beste batzuk: Espainiako sukaldaririk onena, bere jatetxeak Michelin Gidako hirugarren izarra du 1989az geroztik eta 'Restaurant' aldizkari britainiarrak egiten duen munduko 100 jatetxerik onenen zerrendan zortzigarren postuan dago.

Oraingo honetan lortu duen sariari dagokionez, Eusko Jaurlaritza eta Euskadiko Kutxa 1997an hasi ziren Euskal Herritar Unibertsalaren saria ematen. Harrezkero, hamabost pertsona eta elkarte saritu dituzte euren lana aitortuz.

Euskal Herritar Unibertsalak:

- 2007: Guggenheim Museoa.

- 2006: Auñamendi Argitaletxea.

- 2005: Joakin Atxukarro.

- 2004: Joane Somarriba.

- 2003: Ainhoa Arteta eta Martin Ugalde.

- 2002: Xabier de Irala.

- 2001: Pablo Mandazen.

- 2000: Juanito Oiartzabal eta Jon Sobrino.

- 1999: Pedro Migel Etxenike.

- 1998: Donostiako Orfeoia eta Jorge Oteiza.

- 1997: Laboa monsinorea eta Eduardo Txillida.

Lotura interesgarriak

'Arzak' jatetxea
www.arzak.info

Munduko 100 jatetxerik onenen zerrenda
www.theworlds50best.com