euskalkultura.eus

Jose C. Paz, Argentina. Hainbat ekitaldi egin ziren mundu osoan joan den martxoaren 8an, Emakumearen Nazioarteko Egunaren baitan. Beste leku askotan bezala, Argentinan ere bere inguruarekiko engaiamendu isil baina eraginkorra duten emakumeak saritzeko eguna bihurtu da martxoaren 8a. Testuinguru horretan, Buenos Aires probintziako Telered telebista kateak probintzia iparraldeko partiduetako emakumeen omenezko ekitaldia egin zuen 8an bertan. “Desde el alma saioaren aurkezlea den Gabriela Medinak luzatu zigun gonbitea eta oso gustura joan ginen hitzordura. Izan ere, kate honetan beti ematen digute tartetxo bat mintzatzeko eta adeitasun handiz hartu ohi gaituzte”, jakinarazi digu Jose C. Pazeko Toki Eder Euskal Etxeko lehendakari Maria Angeles Oñederrak.

[Maria Angeles Oñederra, Arantxa Escribano kazetaria eta Adelma Molinari sari emanaldian (argazkiaEE)]

Beste ehun bat emakumerekin batera, ‘San Miguel Arcangel’ saria jaso zuen Adelma Molinari Jose C. Pazeko euskal etxeko kideak minusbaliatuen aldeko egindako lanagatik. Adelma Molinarik jardunbide zabala dauka arlo honetan eta bere lan ezagunenen artean minusbaliatuentzako zentro batzuk sortzea aipa daiteke. Gogora dezagun Minusbaliatuak Lagundu eta Babesteko Elkarteko titularra dela Molinari eta Gral. Sarmientoko Unibertsitateko eta Buenos Aires Probintziako Kultur Etxeko sariak ere jaso zituela 2010ean eta 2011ean, hurrenez hurren.

La Platako 2013ko Emakume Nabarmenak

Buenos Airesen ere baina La Plata probintziako hiriburuan beste omenaldi bat burutu zen hainbat emakume saritzeko. Udaleko Urrezko Aretoan, Erakunde eta Gizatalde Atzerritarren Udal Zuzendaritzak Euzko Etxea-ko Maria Celia ‘Marutxa’ Zarranz gailendu zuen “Emakume Nabarmenen” ekitaldian.

“Marutxa La Platan jaio zen familia euskaldun batean. 1946. urtean sartu zen euskal etxean eta harreman ezin sendoagoa izan zuen hortik aurrera Euzko Etxearekin. Bere bizitzako momentu garrantzitsuenak euskal etxearen inguruan gertatu dira; esaterako, bertan ezagutu zuen bere senarra izango zen Bixente Ibarguren. Bere jardunbideari dagokionez, azken hirurogei urte hauetan Marutxa etxeko batzordekide, Emakumeen Taldeko kide eta erakundeko alkate izana da, azken hau 2008-2009 epean”, azaldu digute La Platako euskal etxetik.

[Maritxu Zarranz, La Platako Euzko Etxea-ko lagunek inguratuta, poz-pozik sariarekin (argazkiaEE)]

Martxoaren 12an egindako ekitaldi honetan, Javier Pacharotti hiriko jarduneko alkateak, Gabriel Bruera probintziako diputatuak eta Mauricio Castro Erakunde eta Gizatalde Atzerritarren Udal Zuzendariak izan zuten diplomak banatzeko ardura.