euskalkultura.eus

Chacabuco, Argentina. Irekita dago dagoeneko Chacabucoko euskal etxeko dantza klaseetan parte hartzeko izena emateko epea. Deialdia gazteei eta 5 eta 12 urte arteko neska-mutikoei dago zuzenduta. Gazteentzako eta helduentzako euskara klaseei dagokienez, bi astean behin izango dira, larunbatetan, apirilean hasiz.

Guillermo Larregui euskal etxeak musean jokatzea gustukoa dutenentzat ere badu proposamena. Datozen hilabetetan, asteroko topaketak egingo dituzte muslariek Txapelketa Nazionalean euskal etxearen ordezkari izango den bikotea aukeratzeko. Txapelketa Nazionala abuztuaren 17tik 19ra egingo da, Saladilloko Itxaropen euskal etxean.

Beste alde batetik, ilusio handiz burutu zuten Chacabucoko euskal etxekoek martxoaren 5eko bilera. Bilkura horretan, Euskal Herrira egingo duten talde-bidaia antolatzen hasi ziren, Pablo Pavesa euskal etxeko lehendakariaren eskutik. Bidaia urrian egingo da eta hogei bat egunez luzatuko da. “Txartelak hemen, herrian, erosiko ditugu eta denok elkarrekin aterako gara Argentinatik. Gero, buelta bakoitzak bere kabuz egingo du, batzuk denbora gehiago geratuko baitira”, azaldu diote EuskalKultura.com-i euskal etxetik. Maiatzaren 7an burutuko da datorren bilera.

Emakumearen Eguna

Urteroko tradizioari jarraituz, Emakumearen Nazioarteko Eguna ospatu zuen euskal etxeko ‘Emakume’ izeneko taldeak. Jaia martxoaren 12an izan zen eta afarian zehar musika emanaldia eta mota askotako entretenimenduez gozatu ahal izan zuten bertaratutakoek.

[Garmendia andrea, Elvira Guruceaga, Chichi Lopetegui eta Sonia Armendariz, etxeko ‘Emakume’ taldearen ordezkariak (argazkiaEE)]

Hurrengo ospakizunari dagokionez, Aberri Egunekoa izango da, martxoaren 31an. Ekintza guztiak elkartearen egoitzan burutuko dira, Remedios Escalada de San Martín kaleko 230. zenbakian. Informazio gehiago eskuratzeko, cvchacabuco@yahoo.com.ar edo Facebook-eko Centro Vasco Chacabuco helbideetan.