euskalkultura.eus

Boise, Idaho, AEB. «Zortziak Bat» Sinposioa Jaialdi 2025eko egunekin bat eginez antolatu da BSU Boise State Unibertsitatean. Helburua, izenburuak iradoki zezakeenez, Euskal Herriaren eta bere Diaspopraren arteko lokarria nabarmentzea eta elkarri egiten dioten ekarpena azaleraztea, Boisera deituz arlo desberdinetako irakasle, ikertzaile eta adituak, batzuk Boise eta Idaho eta Estatu Batuetakoak, baina baita Euskal Herrikoak eta Diasporako beste leku batzuetakoak ere. Horretarako elkar ezagutza eta lankidetza nabarmendu nahi izan dira, bilkura honi «Rowing Together - Elkarrekin Arraunean» (sic) izena edo leloa emanez, euskal tradizioetan hain esanguratsua den arraun baten eta arraunlarien figura erabiliz, izan ere guztion lanaren eta lan koordinatuaren beharraren adierazgarri.

Sinposioa asteazken eta ostegunean gauzatu zen, uztailaren 30 eta 31ean BSUn, eta hitzaldi eta solasaldiekin batera, bildu zituen baita ere erakusketak, Mintzodromoak, euskal artzainek AEB Mendebaldeko zuhaitzetan utzitako lertxun-marrei buruzko errealitate birtuak gela eta bisitaldia; euskal arropa tradizionaletan oinarritutako oihal diseinu eta egungo arropa erakusketa bat Amarenak-en eskutik: BSU partaide izan zen Oñati-Boise (1974-2024) ikasle programaren 50. urteurrena dela-eta antolatutako ekitaldiak, eta Iñaki Galdosen horretaz idatzitako liburuaren ingelesezko bertsioaren aurkezpena, labetik atera berri-berria; eta erantzinak ere eskatu ziren "Zer da uretzat euskalduna izatea" galderari, arrapostuak osagai bilakatuko baitira arte pieza interaktibo eta ibiltaria izango den proiektu batean.

Oihane Pardo, Amarena ekimenekoa, bere erakusketan, tradizioa berrikuntzako parte arropen arloan

Pablo Ubierna, Buenos Airesko UBAkoa, sarrera hitzaldia euskal diasporaren historia eta etorkizunaz

Errukine Olaziregik diasporan euskara ikastea hartu zuen gai, bere esperientziatik Madrilen euskara irakasle

 
Eneko Bidegainek musika, diaspora eta Euskal Herria eta diasporaren lokarria aztartu zituen XXI. mendean

Maider Bedaxagar-ek Euskal Herria, kantua eta literaturaren bidez azaldu zuen, zuzeneko bere kantua lagun

Sancho de Beurkoko Pedro J. Oiarzabalek 2MGko euskal beteranoen bere lanaren emaitzen lehen aurrerapena jendaurretu zuen

Nevadako Unibertsitateko (UNR) Iñaki Arrietak lertxun marrez daramaten lana, 3D errealitate birtuala lagun

Ibone Bengoetxea lehendakariordeak euskal kultura nazioartean, Etxepare Euskal Institutuarekin batera

Irene Larraza, Monika Madinabeitia eta Kinku Zinkunegi euskara eta euskal kultura munduratzeko lanez

Erakutsiz, esaterako, irakurletzak medio, euskara eta euskal kultura ikas daitezkeen munduko unibertsitateak

Hitzarmena sinatu zuten EJ-Etxeparek eta BSUk bertako Eloisa Garmendia Bieter-en geroari eusteko

Eusko Jaurlaritzako teknikari Benan Oregi, Diaspora gaietan aditua, "A new era in the Diaspora"z mintzatu zen

Larraitz Ariznabarreta elkarrizketatzaile BEOko Anna Marie Etcheverria eta Aline Izoco Elicagaray-rekin

Asier Barandiaranek euskal emigrazioaren ahotsaz hitz egin zuen, mugikortasunaz eta euskal nortasunaz

Endika Basaguren eta Amaia Hormaetxea, Diasporako euren proiektu "Azken Euskal Dantza / Performance" aurkeztuz

Terryl Asla eta Olatz Sanchez-Txabarri "Zaldi Danced"ekin bertaratu ziren, sormena eta euskal mitoak

Komunikazioa eta Diasporak eta EHak elkarrekin berri izatearen garrantzia aipatu zuen EuskalKultura.eus-eko Joseba Etxarrik

Kantu tradionalek leku berezia hartu zuten Maider Bedaxagar xiberotarsaren bigarren solasaldian

John Bieter, Ziortza Gandarias Beldarrain, John Ysursa eta Maggan Laxalt-ek osatu dute Sinposioa antolatu duen Zuzendaritza Batzordea. Eta esker biziak eman izan zizkieten euren aurretik aitzindari eta aurrekari izandagoei, eta zenbait izen ekarri zituzten horretarako, euren irudiak aretoetan zehar kokatuz. Eurak dira: Warren Pepperdine, Juanita 'Jay' Hormaechea, Pete Cenasarrusa, John 'Pat' Bieter, John Elorriaga, Jimmy Jausoro, Dave Lachiondo eta Eloise Garmendia Bieter. Eskerrik asko eta txalo bero bat eskatu zuten eurentzat, "izan zirelako, garelako..."

(segituko du)