euskalkultura.eus

Hondarribia, Gipuzkoa. Nafarroako sukaldariek euren abilezia erakutsi dute Euskal Herriko III. Pintxo Lehiaketan, izan ere sari nagusiak herrialde honetako jatetxe eta tabernetara joan dira.  Iñaki Rodaballok, Iruñeko Café Niza tabernako sukaldariak, irabazi du txapelketa, “Porky, Porky” izeneko lanarekin. Raúl Fernándezek eta Antonio Cristobalek, Iruñeko Chelsy tabernako ordezkariek, Eusko Label saria eskuratu dute "Txipiroi eta Gernikako piperren tenpura Getariako Eusko Label tomate zopa hotza eta lima lurrinarekin” izena duen pintxoarekin. Sari hau Kalitatea fundazioak eman du, errezetan Eusko Labeldun osagai nagusia, edo behintzat beste bi osagai, dituen errezeta onenarentzat.

Txapeldunordeak ere nafarrak izan dira, zehazki, Taxoareko Baztango Baserria jatetxeko Javier Iturralde eta Matías Gicoli, “Ahate Kabia” pintxoarekin. 2.000 eurotako saria eskuratu dute. Hirugarren postuan Darran Willliamson sukaldaria, Bilboko Bitoque tabernakoa, gelditu da, “Gorringoak patata, hirugihar eta gazta airea" pintxoarekin. Azkenik, epaimahaiaren Aipamen Berezia izan zuen Iruneko Gaztelumendi-Antxon tabernako Félix Manso eta Angela Basabek eginiko “Ajoarriero faltsua aire berriekin”.

Jankideak hunkitu

Fernando Canales, epaimahaiko lehendakaria, izan da irabazleen izenak ezagutzera eman dituena. Bere hitzaldian Canaleseko edizio honetan aurkeztu dituzten pintxoen kalitatea eta sukaldarien maila goraipatu du. “Gaur egun sukaldaritzako profesionalek bilatzen dutena jankideak hunkitzea da eta nire ustez gaur denok lortu duzue hori', esan du.

Epaimahaia honakoek osatu dute: Fernando Canales (Bilboko Etxanobe jatetxea), Iñaki Isasi (Kalitatea fundazioa), Mikel Corcuera (gastronomia aditua), Juan José Lapitz (gastronomoa), Federico Pacha (Slow Food Gipuzkoa),  Alfredo Sarasa (Iruñeko Gasterea),  Ricardo Pérez (Bilboko Yandiola jatetxea), José Antonio Merino (D.O. Txakolí de Araba-ko gerentea), Gonzalo Mutilva (Nafarroako Ostalaritza Eskolako irakaslea), Txomin Gómez (Bilboko NH Villa de Bilbao hoteleko jatetxea), Alberto López de Ipiña (Slow Food Araba) eta Yago Moreno (Ortuellako Meaztegi jatetxea).

Errezeta guztiak liburu batean     

Pintxo guzti hauek prestatzeko gogoarekin gelditu direnek errezetak eta informazio osoa aurkituko ditute Kaneta Argitaletxeak eta Hondarribiako Ostalari Elkarteak argitaratuko duen liburuan. Bertan pintxoen irudiak eta errezetak, sortzaileen argazkiak eta --pintxoak egiteko erronka hartzera ausartzen ez direnentzat-- mokadu hauek dastagai dauden tabernen zerrenda jasoko dira.

Liburuan aurreko bi edizioetako irabazleen errezetak ere agertuko dira eta aurtengo edizioari buruzko erreportai osatu bat ekarriko du. Liburua abenduan aurkeztuko dute Durangoko Disko eta Liburu Azokan eta Euskal Herriko liburudendetan eta lehiaketan parte hartu duten taberna eta jatetxetan izango da salgai. Informazio gehiago, www.hondarribiaturismo.com.