euskalkultura.eus

Medellin, Kolonbia. Kolonbiako euskal komunitateko kide ugari eta Luis Miguel de Zulategi Euskal Etxeko ordezkaritza zabal bat izan zen iragan irailaren 26ean Medellingo Liburutegi Publikoan, Gernikaren bonbardaketan artean utzi zuen lorratzari buruzko hitzaldia entzuteko. Hitzaldiaren izenburua "Picasso y Jorge Oteiza, hilo de continuidad en la obra Gernika" izan zen eta Libe de Zulategi euskal elkarteko kidea izan zen hizlari. Ekitaldian parte hartu zuen, antolatzaileek gonbidaturik, Iñaki Martinezek, Eusko Jaurlaritzaren Kolonbia, Venezuela eta Ertamerikarako ordezkariak.

Bestalde, aste honetan Kolonbiara etorria da SPRIko zuzendaria, Tomas Orbea, Barranquillan egiten ari den Hiri Iraunkor eta Lehiakorren Nazioarko Foroan parte hartzeko. Orbea Eusko Jaurlaritzaren ordezkari gisa gonbidatua izan da eta hiri iraunkorren inguruan euskal esperientziaren berri emango du. Adibidetzat Bilboren birsorkuntzaren kasua aipatuko du Orbeak. Horrez gain, "URBE2050" plataformaren egitasmoa ere azalduko du. Euskal enpresak atzerrian sustatzeko egitasmoa da hau eta enpresa eta erakunde publikoen arteko lankidetzan du oinarria.

Jardunaldietan Kolonbiako gobernuko lehen mailako ordezkaritza bat izango da, tartean German Vargas, Etxebizitza ministroa; Juan Gabriel Uribe, Ingurumen eta Garapen Iraunkorrerako ministroa; eta Mauricio Cardenas, Ogasun ministroa.