EEak eta Kultura Zuzendaritzak erakusketa ibiltaria zabalduko dute bihar Tres Arroyosen Immigrazioaz

2009/10/21

Immigrazioaren Museo Nazionalaren iragarkia

PUBLIZITATEA

Buenos Aires hiriburuan egoitza duen Argentinako Immigrazioaren Museo Nazionaletik ekarrita, Immigrazioari buruzko erakusketa ibiltaria egongo da ikusgai bihartik aurrera eta larunbatera arte Tres Arroyoseko 'Hiru Erreka' Euskal Etxean. Euskal elkarteak, Udaleko Kultura Zuzendaritza lankide antolatutako erakusketa honek etorkinei lotutako hainbat gai era berri eta erakargarrian zabaltzea du helburu eta publiko orokorrari, euskaldunei eta euskaldunak ez direnei, dago zuzenduta. Museoko adituak gidari, herriko eskola guztietako ikasle eta helduek parte hartu ahal izango dute ekitaldi interaktibo honetan. Eta proposatutako ibilbidea burutu eta gero, bisitari bakoitzak bere arbasoei buruzko informazioa duen agiri bat jasoko du oroigarri gisa.

Tres Arroyos, Argentina. Ezaguna da Tres Arroyoseko Euskal Etxeak immigrazio eta immigranteen gorabeherak ezagutarazteko eta oro har komunitatearen alde egiten duen lana. Urtero antolatzen dituzte mota askotako ekintzak guztiona den iragan hori ahaztu ez dadin. Bide horri ekin diote oraingoan ere Hiru Errekako lagunek eta datorren urriaren 22, 23 eta 24an, Tres Arroyosko Udaleko Kultur Zuzendaritza lankide, Euskal Etxearen egoitzan jasoko dute immigrazioaren xehetasunak islatzen dituen erakustaldi bat, Immigrazioaren Museo Nazionaletik ekarrita. Erakusketa ibiltari hau Buenos Airesetik bidaiatuko da eta zabalik izango ditu hiru egun hauetan ateak, bertara bisitari hurbildu nahi duen ororentzat.

Etorkinen Hotelaren fatxada, herritartasun guztietako etorkinak, bidaia, zerbitzu eta ekintzak, nola zen bizitza hotelean, jangela, eta etorkinen erretratuak izango dira erakusketaren gaiak. Ekimenak argazkiak hartuko ditu oinarri; hala ere, Hego Amerikako Migrazio-Ikasketa Zentroak digitalizatutako liburu zaharreko datuak --esan nahi baita 1881 eta 1950 artean argentinaratu ziren itsasontziei buruzko jakingarriak-- ere eskainiko dira. Horretaz gai, bideoak eta dokumentalak ere proiektatuko dira.

Museoko aditu bik, Sergio Sampedro eta Virginia Lietti arkitektoek, lagunduko dituzte bisitariak, eskolako ikasle zein heldu, euren ibilbideetan. Erakustalditik pasatuko diren pertsona guztiek arbaso immigranteen informazioa duen agiri bat jasoko dute, bisitaren oroigarri gisa.

Lotura interesgarriak

Erakusketari buruzko xehetasunak
www.hiruerreka.com.ar

Immigrazioaren Museo Nazionala
www.mininterior.gov.ar/migraciones/museo/index.html