euskalkultura.eus

Gral. Rodriguez, Argentina. ‘Mas Mus’ izeneko Eusko Aterpea-ko muslarien taldeak ez du aurten udako oporrik hartu. Marcela Balbi Mutuberriaren ardurapean, larunbatero elkartu dira partaideak uda osoan, arratsaldeko 3etan, euskal etxeko egoitzan. “Taldea gero eta jendetsuagoa da eta musean aritzeaz gain txalaparta ere jo dute partaideek. Giro ezin hobea dago elkarretaratzeetan, eta urtarrilaren 20an mus barne txapelketa antolatu genuen”, azaldu diote euskal etxetik EuskalKultura.com-i. Mus tailerra leku eta ordutegi berean burutuko da martxotik aurrera ere, etxeko programazioaren barne.

Aldi berean, etxeko dantzariak oso goiz itzuli dira aurten entseguetara. Klaseak otsailaren 18an hasi ziren, eta larunbatetan jarraitzen dute izaten, Agustina Andrea Olaizola irakasle.

Martxoarekin batera, euskal etxea ohiko erritmoa hasiko da hartzen eta datorren larunbatean 2013ko lagun arteko lehenengo afaria egingo du euskal etxeak. Behin sukaldeak piztuta, sukaldaritza arloko hitzorduak bata bestearen ondoren gauzatuko dira. Datorren larunbatekoaren ondotik, hurrengoa, martxoaren 29an izango da. Ostiral Santuan txibiak Bizkaiko erara prestatuko dituzte etxeko kideek anoka saltzeko.

Euskara klaseak, ume eta helduentzat

Urtero bezala, zenbait ikastaroak irekiko dira Eusko Aterpea-n euskararen inguruan. Umeentzako tailerra, esaterako, larunbatero izango da arratsaldeko ordu 2etatik 3:30etara; eta gazte eta helduentzakoak egun berean baina 3:30etatik 5:30etara. Euskara klaseak apirilaren 6an hasiko dira, baina izena emateko epea irekita dago honez geroz. Informazioa eskuratzeko, idatzi ezazu centrovascogralrodriguez@yahoo.com.ar helbidera.

Gral. Rodriguezeko euskal gizataldeko ordezkariek gogorarazten dute, baita ere, 'Nikomedes Iguain Azurza' liburutegia astelehen, asteazken eta ostiralero dagoela irekita, arratsaldeko 4etatik 7etara. Horrez gain, erakundearen Ohiko Biltzar Orokorrean parte hartzera gonbidatzen dute. Hitzordua, martxoaren 23an da, arratsaldeko 6:30etan.