euskalkultura.eus

Trenque Lauquen, Argentina. Joan den uztailaren 9an, Trenque Lauquengo Euskal Sustraiak Euskal Etxeko Kultura Azpibatzordeak ehun eta hogeita hamar lagun bildu zituen bere San Fermin Jaian. Aurten Necocheako “Otxoteak” kantatu zuen Euskal Sustraiak-ek antolatutako ekitaldian eta herriko 'Potxolo' Crespok Villa General Belgranora joateko opor-bidaia irabazi zuen jaiko zozketan. FEVAko lehendakaria den Ricardo Basterrak egun osoa pasatu zuen Buenos Aires probintziako herri honetan. Arratsaldean bilera bat izan zuen euskal etxeko kideekin eta gauean afarian ere hartu zuen parte.

[Trenque Lauquengo Euskal Sustraiak Euskal Etxeko kideak Ricardo Basterrarekin (erdian, txapeldun) bildu ziren]

[FEVAko lehendakariak Trenque Lauquengo euskal etxekoekin afaldu zuen]

La Platako ospakizuna

Buenos Aires probintziako hiriburuan, ordea [La Platan, alegia], uztailaren 4an gauzatu zen ospakizuna. Egun osoko egitaraua "Marinel Zaharren Egoitza"ko elizan hasi zen, meza eta eliztar eta zaharrentzako dantza ikuskizun batekin. Ondoren, hiriko Moreno Plazan bildu ziren euskal etxeko kideak; hor, Gernikako kimuaren ondoan omenaldi bat egin eta gero dantzariek Aurresku, San Miguel, Ezpatadantza eta Lore Arku dantzatu zituzten. Euskal komunitateko lagun mordo bat bertaratu zen plazara, tartean Elvira Kortajarena Euskadiren Argentina, Brasil, Paraguai eta Uruguairako Ordezkaria, Ricardo Basterra FEVAko lehendakaria eta Javier Clua euskal etxeko lehendakaria bera.

[La Platako Euzko Etxea-ko kideek omenaldi bat antolatu zuten La Platan Gernikako kimuaren ondoan]

[Euzko Etxea-ko dantzariek La Platako Moreno Plazan dantzatu zuten]

San Fermingo Txupinazoarekin abiatu ziren euskal etxeko ekitaldiak. Paella prest zegoen lagun guztiak egoitzara heldu orduko. Bazkaltzeko orduan hiriko alkate Pablo Bruerak eta Javier Mor Roig probintziako senadorea ere bildu ziren, beste hainbat gonbidatuen artera. Euskal Herritik, Gipuzkoako Astigarraga herririk etorritako “Aire Aire Trikitixa” Taldeak musika jarri zion festari eta adin guztietako jendea ipinin zuen dantzan. Euskal Etxeko abesbatzak, berriz, Maria Evangelina Bertolaren gidaritzapean eta Maite Unzurrunzaga piano-jotzailearen laguntzaz, euskal errepertorioko abesti batzuk eskaini zituen.

[Ehunka lagun bildu ziren La Platako Euzko Etxea-ra Sanferminak ospatzeko]

Euskal etxeko dantzariek euren koreografiak erakutsi zituzten arratsaldean zehar: txikienek, Kalejira, Fandango eta Ipurdi Dantza; ertainek, Txinparta; eta nagusiek Aurreskua, Zuberoako Maskarada, Sorginak, Plazara, Fandangoa eta Arin Arin. Txikiek gainera, Donostiako soinuak ekarri zituzten Euzko Etxea-ra danborrada jendaurretuz. “Zaharrak” taldea ere pasatu zen tauletatik; euskal etxeko helduek Gorulari dantzatu zuten.

Euskal etxe ezberdinetako dantzariak elkartu ziren Ayacuchon

Ayacuchoko Euskal Odola Euskal Etxeak ere luxuzko gonbidatuak izan zituen Sanferminak ospatzeko. Uztailaren 18an Maipuko Anaitasuna, Tandilgo Gure Etxea eta Cañuelasko Denak Bat euskal etxeko dantzariak, Buenos Airesko Ekin Dantzari Taldearekin batera, Ayacuchora gerturatu ziren bertako jaialdian parte hartzera.

[Buenos Airesko Ekin Dantzari Taldeak Ayacuchoko Parrokian dantzatu zuen]

Goizeko hamaiketan, esker-emate meza egin zen herriko parrokian. Ondoren, parrokian bertan –eguraldiak laguntzen ez zuelako– dantzariek euren emanaldia gauzatu zuten. Dario David Ayacuchoko alkateak, euskal komunitatekoei lagundu zien Club de Leones-en egin zen jaian. Bazkaldu baino lehen, Fermina Mariezcurrenak, euskal etxeko lehendakariak, ongietorria eman zien Ayacuchora bidaiatu ziren taldeei eta ondoren “Zer dakit euskaldunei buruz?” lehiaketaren eta euskal etxeak antolatutako zozketaren sariak eman zitzaizkien irabazleei. Arratsaldean zehar, Euskal Herriko dantzez gozatu ahal izan zuten gonbidatuak.

[Ayacuchoko "Club de Leones"-en dantzariek beren ikuskizunarekin jarraitu zuten]