euskalkultura.eus

General Villegas, Argentina. Euskal Etxeko bazkideen ahalegin handiz eta Udalaren sostenguarekin, abuztuko azken astean ekin diote Gral. Villegas-eko euskaldunek euren egoitza berria izango den eraikinaren eraikitzeari. Lehenengo etapan, burdinezko egitura eta teilatua, bi isurialdekoa, egingo dituzte. Hori bukatuta, berehala altxatuko dira hormak.

Etxe berri hau hirigunetik bost kaletara dago eta gaur egun alokatzen duten etxearen auzo berean. Eraikin berriaren alboan, “Plazoleta Gernika” delako enparantza ikus daiteke. Bertan landatu zuten Euskal Etxeko kideek joan den martxoan, La Platako Euzko Etxeko José Orbaicetak emandako Gernikako Arbolaren kimua.

Euskal Komunitatea engaiaturik

Eraikuntza-lanen diseinuaren arduraduna Claudia Esain Euskal Etxeko bazkide eta arkitektoa da. Amaitutakoan, bi solairuko etxeak Euskal Herriko baserri baten itxura izango du kanpotik. Barrutik, berriz, beheko pisuan, jai eta ekitaldiak antolatzeko berrehun bat lagunentzako aretoa, sukaldea, komunak eta bulego bat. Liburutegia, euskara eta dantza klaseetarako ikasgela eta hitzaldiak egiteko beste areto bat, ostera, lehenengo pisuan egongo dira.

Oraindik lanak noiz bukatuko diren esateko goiz bada ere, bertako euskaldunak erabat murgilduta daude proiektu erraldoi honetan eta gogor ari dira lanean baita ere diru kontuei behar bezala aurre egiteko. Horretarako, hain zuzen, hainbat ekintza ari dira garatzen, eta gehiago garatuko, besteak beste, janari salmentak, kultur ekitaldiak, eta tabernak herriko deialdietan.