euskalkultura.eus

Errenteria, Gipuzkoa. France Press berri agentzia Mugaritz jatetxean izan da, zuzenean Luis Andoni Aduriz sukaldariak gidatzen duen abentura gastronomikoa ezagutu ahal izateko. Haien esanetan Adurizen ‘Idiazabal gaztarekin eginiko gnocchiek eta buiaz eginiko ravioliek Restaurant Magazine aldizkari britaniarreko 700 adituak konkistatu dituzte’ .

Artikuluak ‘duela hamar urte baserri bat erostea erabaki zuen langile sutsua’ bezala deskribatzen du Aduriz, sukaldariak bere burua ‘sortzaile baina ez berritzailetzat’ duela gehituz. Adurizek euskal sukaldari handien lana, Juan Mari Arzak eta Martin Berasategirena hain zuzen ere, goraipatzen du, nahiz eta Restaurant aldizkariaren aburuz sukaldari gazteak aintzindariak gainditu egin dituen jada. Aldizkariaren klasifikazioa joan den apirilean argitaratu zenetik, Mugaritz beteta egon da egunero eta bezeroen %75a atzerritarrak, asko frantsesak eta britaniarrak, izan dira.

Emozioak agertarazi

Sukaldariaren esanetan bere helburua bezeroen ‘bihotza lapurtzea’ eta ‘bere platerretan paisaiak islatuz emozioak sortzea’ da. Jatetxea lanean hasi zenean 12 langilek 100 bat bezeroentzat lan egiten zuten; gaur egun 40 langile dira 40 bezeroentzako. Karta desagertu egin da, eta horren ordez menuak egunetik egunera merkatuan erositako produktuen arabera prestatzen dituzte.

Sukaldariak kalitatezko euskal produktuen hornikuntza du, adibidez, arraultzak ‘inguruetako produktore txikiengandik’ erosten ditu eta belar aromatikoak bere lorategitik batzen ditu. Restaurant Magazine aldizkariak etorkizun bikaina iragartzen dio Adurizi, ‘sukaldaritza berriago eta dibertigarriago baterantzako aldaketa egingo duen funtsezko agente bezala’. Mugaritzi buruzko infornazio gehiago, hemen.