euskalkultura.eus

Cordoba, Argentina. Martxoaren 1ean, Unibertsitateko instalazioetan eta HABEko babesarekin gauzatu zuten akordioa FEVAko eta Unibertsitateko agintariek. FEVAren izenean, Ricardo Basterra eta Marta Abarretegui bertaratu ziren 'La Docta' ezizenaz ezaguna den hirira, azken xehetasunak adostu eta hitzarmena sinatu ahal izateko. Basterra eta Abarrateguirekin batera, Elba Mocoroa eta Noe Fernandez Gerora elkarteko euskara irakasleak ere izan ziren bileran. Unibertsitateko ordezkariak, berriz, Guillermo Badenes irakaslea eta Hizkuntza Fakultateko dekano Silvia Barei izan ziren.

"Gero eta leku zabalagoa ematen ari zaie 'ezohiko hizkuntzei' unibertsitateko Hizkuntza Fakultatean. Azken urte hauetan juduera, kitxua, txinera, piamontera eta arabiera eskolak sartu dituzte ikastaro eskaintzan eta orain euskara emateko aukera gauzatu da", azaldu diote Cordobako euskara irakasleek EuskalKultura.com-i. “Klaseak ez dira graduko karreren baitan emango eta, beraz, ez dira soilik unibertsitateko ikasleei zuzenduak izango, komunitate osoari baizik”, azaldu du Elba Mocoroak.

Datorren astean egingo dute euskara irakasleek eta Fakultateko arduradunek bilera 2013ko lehenengo ikastaroaren datuak zehazteko. “Ia hilabete osoa daukagu gauzak antolatzeko, ondoren eskolak apirilean hasteko". "Paregabeko aukera da hau euskara eta euskal kultura Cordoban eta batez ere gazteen artean zabaltzeko. Aldi berean azpimarratu nahi dugu ondo baino hobeto hartu gaituztela unibertsitateko ordezkariek. Sinadura bukatutakoan, FEVAko buruzagiek ikurrina oparitu zion dekanoari", adierazi dute Gerora elkarteko Mocoroa eta Fernandez-ek.