euskalkultura.eus

Bilbao, Bizkaia. Dionisio Choperena, AEBetako telefono mugikorren iragarki bateko izarra izan zen artzaina; Blas Uberuaga, 1994ean aurreneko euskal webgunea sortu zuen euskal-amerikarra; Henar Chico, Boisen bizi den blogger bizkaitarra; Jose Antonio Alcayaga III, New Yorkeko Eusko Etxeko kide eta 1500 Alcayagatar biltzen dituen orriaren sortzailea... horietxek dira Facebook Stories webguneak bere lehen egunetan argitaratu zuen artikuluko protagonistetako batzuk. Deustuko Unibertsitateko historialari Pedro J. Oiarzabalek idatzi du, eta bertan munduko euskaldunen eta sare sozialen arteko harremanari buruz mintzatu da. 

Choperenak iragarkian mugikorra munduko lagun eta senitartekoekin hitz egiteko erabiltzen zuen, artaldea zaintzen ari zela; bada, Oiarzabalek artikuluan azaltzen duenez, horrelaxe erabiltzen dituzte egun Diasporako euskaldunek sare sozialak: elkarren berri izan eta kultura mantentzeko tresna gisa.

Facebooken egoitzan

Iragan uztailean Facebook Stories-eko Jeffrey Gerson editoreak Oiarzabal kontaktatu zuen, eta harrezkero buruz-buru lan egin dute datuz josiriko ikerketa akademiko mardula artikulu bihurtzeko. "Aurtengo udan AEBetan izan nintzen eta Gerson aurrez-aurre ezagutzeko bisita egin nuen Facebook-ek Kalifornian duen egoitzara. Harrigarria izan zen Diasporako euskaldunen gaiari buruz zenbat zekien ikustea", azaldu dio Oiarzabalek EuskalKultura.com-i. Historialariak azpimarratu egin du enpresak gauzak argi utzi zituela hasieratik. "Marketing-ik ez zutela nahi esan zidaten, baizik eta Facebook-ek euskal Diasporaren komunitatean izan duen eragina jakitea".

"Facebook-ek milioika erabiltzaile ditu eta horien artean badira diaspora asko eta diaspora horiei buruzko aditu asko, horregatik oso interesgarria da geurea aukeratu izana", hausnartzen du Oiarzabalek. Ziur aski, historialariak arlo honetan egin duen lanak eta argitalpenek ere izan dute zerikusirik horretan. 2010ean, adibidez, Diasporas in the New Media Age (University of Nevada Press) liburua argitaratu zuen eta berriki artikulu bat idatzi du Journal of Ethnic and Migration Studies aldizkari espezialduan (Ulf-Dietrich Reips adituarekin batera) Diaspora, emigrazioa eta sare sozialei buruz. 

Aurki, euskaraz

Oiarzabalen aburuz Facebook "lupa bat bezalakoa da" eta sare sozialei esker "gauza oso lokalak global bihur daitezke" lupa horren azpian jartzen direnean. Hori dela eta, euskal kultura hor izateak duen garrantzia azpimarratzen du.

Euskaldunak sare sozialaren milioika erabiltzaileen artean 'ozeanoan ttantta bat' baino ez dira, agian, baina euren presentziaz eta euskararen erabileraz konturatu omen da Facebook. "Oso interesgarria da enpresa honek kultura eta hizkuntza gutxituekin duen harremana. Eurak izan ziren artikulua euskaratzea proposatu zutenak, adibidez", agertu du historialariak.

[Datozen egunetan argitaratuko omen da euskarazko artikulua. Horren berri eduki bezain pronto, lotura gehituko dugu]