Euskara eta hizkuntza politikak ardatz Complutense Unibertsitateko Eleaniztasunari buruzko saioetan

2013/12/02

Complutense Unibertsitateko eleaniztasunari buruzko jardunaldietan, Kike Amonarrizek "Tribuaren Berbak" saiorako Madrilen grabatutako erreportajea izan zen ikusgai (argazkia Etxepare)

PUBLIZITATEA

Iragan azaroaren 25 eta 26an Madrilgo Complutense Unibertsitatea hizkuntzalari eta filologoen topagune bihurtu zen, Euskal Filologia sailak antolatutako Iberiar Penintsulako Eleaniztasunari buruzko Jardunaldiei esker. Lehen egunean portugalera izan zen ardatz, eta bigarrenean euskarak leku nabarmena izan zuen, Arantzazu Fernández Iglesiasek eta Karlos Cid Abasolok eskaini zituzten hitzaldiekin. Topaketaren aurkezlea Kike Amonarriz hizkuntzalari eta umorista izan zen. Amonarrizek "Tribuaren berbak" saioa aurkezten du ETB1-en eta Madrilgo egonaldia erreportaje berezia grabatu eta jardunaldietan erakusteko baliatu zuen.

Madril, Espainia. Madrilgo Complutense Unibertsitateak Iberiar Penintsulako Eleaniztasunari buruzko bigarren Jardunaldiak hartu zituen iragan azaroaren 25 eta 26an. Unibertsitateko Euskal Filologia Sailak antolatu zuen topaketa, Etxepare Euskal Institutuaren lankidetzarekin. Jardunaldietan Complutense, UNED, Salamanca eta Aveiro unibertsitateetako hamaika aditu bildu ziren eta euskararen, galizieraren, katalanaren, gaztelaniaren, portugaleraren eta astur-leondarraren hizkuntz-politikei buruz aritu ziren.

Euskarari dagokionez, bigarren egunean honako hitzaldiak entzun ahal izan ziren: ¿Alta comedia o drama?: políticas lingüísticas y producción teatral en euskera, Arantzazu Fernández Iglesiasena (UNED), eta Cotejo de las políticas lingüísticas de la Comunidad Autónoma Vasca y la Comunidad Foral de Navarra, Karlos Cid Abasolok eman zuena (Universidad Complutenseko Euskal Filologia saileko irakaslea eta topaketaren antolatzailea da Cid Abasolo).

Saioen aurkezle izan zen Kike Amonarriz, euskal filologo eta umorista. Telebistari esker oso ezaguna da Amonarriz Euskal Herrian, hainbat saioetako aurkezlea izan baita (esaterako, "Mihiluze"). Egun, "Tribuaren Berbak" euskarari buruzko saioa aurkezten du. Eleaniztasunari buruzko jardunaldiak aurkezteaz gain, saioreko hainbat erreportai egiteko baliatu zuen Madrilgo egonaldia Amonarrizek. Hemen, Karlos Cid Abasolori eginiko elkarrizketaren klip-a ("Egia al da euskara ikastea ezinezkoa dela?").

"Tribuaren berbak" saioa osorik, jarraian: