euskalkultura.eus

Frankfurt, Alemania. Alemaniako aurreneko Euskarazko Literatura Lehiaketa abian da, Frankfurteko Goethe Unibertsitateko Euskara irakurletzak antolatuta. Liburuaren Nazioarteko Egunaren eta Gernikaren Bonbardaketaren urteurrena direla eta, Mikel Babiano irakurleak lehiaketa hau antolatu du, ikasturteari amaiera ederra emateko asmoz.

Lehiaketan parte hartzeko beharrezkoa da Alemanian bizitzea eta euskara ikasle izatea; nahiz eta ez da ezinbestean unibertsitatean matrikulatuta egon behar. Ez dago adin mugarik eta prosa zein poesia kategoriatan aurkeztu daitezke.

Bi gai nagusi hauetan oinarritu behar dira testuak: Gernika gaur egun edo gai librea. Azken horren baitan uler daitezke, esaterako, proposamen hauek: euskaldunak, euskal kultura Alemanian edota egun bat Euskal Herrian.

Lanak (egilearen izen-abizen eta bizitokia dutela) 2013ko ekainaren 28ra arte bidal daitezke, PDF edo word dokumentu gisa. Lanak bidaltzeko eta argibide gehiagorako honako helbidera idatzi: babiano@em.uni-frankfurt.de.

Euskal Zinemaldia

Bestalde, abian da, jada, irakurletzak Frankfurten antolatu duen Euskal Zinemaldia. Astelehenero egingo dira emanaldiak, hila amaitu arte. Datorren astelehenean, ekainaren 17an, Alberto J. Gorritiberea zuzendariaren “Arriya” lana izango da ikusgai eta ekainaren 24ean Pabo Berger bilbotarraren ”Torremolinos 73″ filmak itxiko du saila.

Aurretik ikusgai izan dira Jon Garaño eta Joxe Mari Goenagaren “80 egunean” eta Enrique Urbizuren “No habrá paz para los malvados". Zinemaldia Etxepare Euskal Institutuko irakurletzak eta hiriko Cervantes Institutuak elkarlanean antolatu dute.