euskalkultura.eus

Saladillo, Argentina. FEVAren kultur eskaintzaren markoan eta Gral. Rodriguezeko Eusko Aterpea euskal etxearen izenean eman zuen 'Picassoren Guernica' bere hitzaldia Elena Itcea irakasleak Saladillo herrian. Hitzordua joan den abuztuaren 19an izan da eta herriko pintore batzuk bildu zituen.

“Dagokion testu inguru historikoan aztertu behar da Picassoren pintura. Horregatik oso garrantzitsua da momentu hartako gertaerak ezagutzea. Irudiak ez du era zuzen batean bonbardaketa erakusten. Hala ere, hori irudikatzen du eta pakearen aldeko ikur bihurtu da”, azaldu zien Gral. Rodriguezeko arte irakasleak Saladilloko hedabideei. “Gure asmoa da euskal kultura komunitatearengana hurbiltzea eta hitzaldi honekin urrats bat aurrerago goaz gure xedean”, adierazi zuen euskal etxeko kide den Silvina Bordenavek.

[Elena eta Maricarmen Itcea Silvina Bordenaverekin (argazkia EE)]

Lagun Onak abesbatzaren kontzertua

“Lagun Onak korua ekartzeko ideia duela hiru bat urte sortu zen. Ez da erraza izan baina Nerea Arza izandako kontaktuari esker azkenean lortu dugu”, jarraitzen du Bordenavek.

Taldearen berrogeita hamar kide aurkeztu ziren irailaren 4an Saladilloko Marconi antzokian. Herritarren erantzuna ere oso ona izan zen; izan ere, ehundik gora lagun bildu ziren aretoan, tartean Carlos Gorosito alkatea, Kultura eta Hezkuntza idazkaria den Aldo Catullo, eta Maria Ines Pellegrini eta Marcela Barreiro Kultura eta Hezkuntza idazkariak.  

[Publikoak antzokiko aretoa bete zuen Lagun Onak entzuteko (argazkia EE)]

Miguel Angel Pesce zuzendaritzapean, Lagun Onak abesbatzak errepertorio handia eskaini zuen Saladillon. “Agur Maria”, “Aita Gurea”, “Ama begira zazu” eta “Nerea izango zen” izan ziren jarduera handiko abeslariek euskal kantutegiko egindako pieza batzuk. Immigrante Eguneko ospakizunen artean burututako ekitaldi honetan dantza taldeek ere hartu zuten parte irailaren 4an.