euskalkultura.eus

Saladillo, Argentina. 300 bat lagun bildu ziren abenduaren 4an Apeadero Klubean Saladilloko 'Itxaropen' Euskal Etxearen XII. urtemuga ospatzeko. Duela urte batzuk bere egoitza propioa eraikitzen ari den euskal etxeak izan zuen aurten ere gonbidatuen artean herriko alkatea, Carlos Antonio Gorosito. Gorositok hitz batzuk zuzendu zizkion bildutako jendeari eta 'Itxaropen'eko kideak zoriondu eta animatu zituen erakundearen proiektuekin jarraitzera. Bide batez, Saladilloko alkateak Udalak euskal etxeari mota askotako laguntzak eman zizkiola ekarri zuen gogora.

['Itxaropen' Euskal Etxeko lehendakaria den Hector Altamira Carlos Gorosito herriko alkatearekin]

Beste alde batetik eta egoitzaren eraikuntzako lanak amaitu ahal izateko euskal etxeak maiatzean kaleratu zituen 300 bonoen arteko zozketa ere egin zen abenduaren 4ean. 190 zenbakiarekin Mario Sayos-ek Euskal Herria bisitatzeko bi txartel irabazi zituen.

Beste euskal etxe batzuetako kideak ere bertaratu ziren Saladillora 'Itxaropen'en urtebetetzean parte hartze aldera.  Cañuelasko 'Denak Bat'eko dantzariek alaitasun eta koloreak jarri zizkioten gauari euren koreografiekin; Maria Angeles Oñederra FEVAren izenean joan zen eta Azulgo Euskal Etxeko ordezkariak ere egon ziren topa egiteko momentuan.