euskalkultura.eus

Saint Pierre, Saint Pierre eta Mikelune. Saint Pierre eta Mikelunen bukatu berria da joan den igandean astebete iraun duen pala norgehiagoka, 'Auberge Quatre Temps' eta 'Udaberri' izenpean. Emakumeen kasuan, Euskal Herritik propio gonbidatuta, Emilie Barneche mehaindarra (Nafarroa Beherea) eta Hegoa Etcheverria itsasuarra (Lapurdi) lehorreratu ziren Europatik, bertako pilotariekin lehiatzeko. 18 eta 19 urteko bi neska hauen txapelketan, bost bikote lehiakideetatik, lau Saint Pierre eta Mikelune bertakoak ziren eta eurak Euskal Herritik.

Partidak joan den igandean hasi ziren eta asteko egun guztietan jokatu ondoren, ostiralean final laurdenak eta finalerdiak jokatu eta, larunbatean atsedena hartuta, finalak igandean, maiatzaren 17an, gauzatu ziren, beti ere Saint Pierre eta Mikeluneko Euskal Pilota Liga eta Euskal Etxea antolatzaile. Emilie Barneche eta Hegoa Etcheverriak lehen aldia zuten St Pierren zein Amerikan, eta ez dute azken partida, ezta bidaia osoa ere, erraz ahantziko, txapela irabazteaz gain, abegikortasun handia eta oroitzapen ederrak bildu baitituzte.

Ipar Amerikako Ternua aldean, Saint Pierreko trinketean, kokatutako Txapelketako irudia

Euskal Besta Txapelketarekin batera: bertako Orok Bat dantza taldeko dantzariak

Eta Euskal Etxean, Saint Pierre eta Mikeluneko Bankuen Korua euskal abesbatza

"Harrera paregabea egin digute hemengo Pilota Ligako eta Euskal Etxeko kideek eta lagun guztiek", esan diote EuskalKultura.eus-i. "Esperientzia 'zinez bikaina' izan da, eta kirol arloan ikasi dugunaz gain, hemengoek etxean bezala sentiarazi gaituzte, bertako bazterrrak ezagutzera eramanik eta bisita anitz eginez", esan digute, berriz ere hegazkina hartu eta Euskal Herrira itzuli aurretik. Galdera eginik hona edo, konparazio, Kaliforniako pilotarien kontra jokatzera itzultzeko prest leudekeen, pilotari gazteek "zalantzarik gabe" adierazi dute.