euskalkultura.eus

Elko, AEB. Izena emateko epea irekita dago Anita Anacabe Franzoia elkotarrak gidatuko duen Euskal Herrirako bidaian parte hartzeko. Aurreko edizioetan bezala, elkotarrak Education First erakundearekin  lankidetzan antolatu du bidaia. Taldea Salt Lake City-tik abiatuko da eta 13 eguneko egonaldia egingo du Euskal Herrian. 

Anacabek bidaiaren nondik-norakoak azaldu dizkio EuskalKultura.com-i. Euskal Herriko egonaldia Bilbon hasiko da, irailaren 27an. Bertatik taldea Donostiara joango da eta hiria ezagutuko du. Hurrengo egunetan bidaiariek hainbat leku bisitatuko dituzte: Zugarramurdi, Donibane Lohizune, Uharte Arakileko arkeologi-gunea, Donibane Garazi, Orreaga, Bilbo, Laguardia, Bermeo, Bakio, Gaztelugatxe, Lekeitio, Markina eta Gernika. 

Senitartekoen bila

Bidaian, Euskal Herria eta euskal kultura bertatik bertara ezagutzeko interesa zuten estatubatuarrez gain, euskal jatorriko amerikarrek ere parte hartu ohi dute. Asko Euskal Herrian senitartekoak bisitatzeko asmoarekin doaz; beste zenbaitzuk, lokarria galdutako familia galdua aurkitzeko itxaropenarekin. Anacabek horiei guztiei laguntzen saiatzen dela azaldu du, eta bidaian senitartekoekin biltzeko tarte berezi bat egingo du hala nahi dutenentzat. Horrez gain, familiaren bila ari direnei, abiatu aurretik informazioa emateko eskatu die, senitarteko horiek aurkitzen saiatzeko aukera izan dezan.

Informazio gehiago jaso nahi izanez gero, idatzi Anita Anacaberi (hona). Tourrari buruzko datu guztiak Education Firts College Study Tours erakundearen webgunean (www.efcollegestudytours.com/enroll) daude. Bidaiaren zenbakia 1202698 da.