euskalkultura.eus

Elko, EEUU. Anita Anacabe elkotarrak Educational Tours enpresaren tour pribatu bat gidatuko du aurten, besteak beste Madril, Bilbao, Gernika, Donostia, Donibane Lohitzune (Saint Jean de Luz) eta Bartzelona hirietan zehar. Bidaia urrian egingo da eta prezioa parte hartzaile kopuruaren araberakoa izango da: 2.295 dolar pertsonako 20 laguneko taldea egiten bada, eta 1.995 dolar  bidaiariak 35 izanez gero.

Anita Anacabek ederki ezagutzen ditu Euskal Herria eta euskal kultura. Nevadako Elko hirian jaioa, bere gurasoak bizkaitarrak ziren eta Anita sarritan izan da Euskal Herrian. Elkoko euskal komunitateko kide ezaguna da -Elkoko Euskal Etxeko lehendakaria izan da-- eta euskara eta gaztelera irakaslea da. Anacabe bidaiaren buru izango da, xehetasunak eta joan-etorriak koordinatuz, bisitaldiak gidatuz eta euskara edo gaztelera itzultzaile lanak eginez. Gainera, euskal senitartekoekin bildu edo lehen aldiz ezagutu nahi dituztenentzat bere laguntza ere eskaintzen du hitzordua antolatu ahal izateko.

Urriaren 27an bidaia hitzordu oso berezia izango dute bidaiariek Gernikan, euskal jai tipiko bat ezagutu eta bizitzeko aukera izango dutelako. Herri bizkaitarrean Urriko Azken Azoka egingo dute eta inguruetako nekazari, abeltzain eta jai gogoa duten gazte eta nagusi oro bilduko da bertan. Hurrengo  egunean taldea Bartzelonara joango da, bidean Elciegoko 'Ardoaren hirian' geldialditxoa eginez eta Zaragoza bisitatuz. Bartzelonan bi egun egingo dituzte, besteak beste Macba museoa bisitatuz. Urriaren 30ean AEBetara bueltatzeko hegaldia hartuko dute.