Euskal Asteburua antolatu du Artea EEak: Mallorcan 48 orduz euskara hutsean bizitzeko aukera bakana

2013/04/26

Artea Euskal Etxeak antolatu duen barnetegiaren afitxa

PUBLIZITATEA

Larunbat eta igande honetan nahi duenak euskal asteburua bizitzeko aukera bikaina izango du Mallorcan, Artea Euskal Etxeak antolatu duen barnetegiari esker. Ikastaro trinko honek arrakasta handia izan du aurreko edizioetan, eta oraingoan ere euskal hizkuntza izango du oinarri, baina horrez gain euskara ikasgeletatik aterako dute eta beste zenbait ekitaldietara zabalduko dute. Horrela, euskaraz biziko dira 48 ordu hauetan, euskal dantza ikastaroak, txalaparta lantegiak, afariak eta bestelako ekimen ugari eginez.

Palma, Mallorca. Mallorcako Artea Euskal Etxea ahalegin handia ari da egiten euskara klaseetan, Manoli Korta irakaslearen eskutik, eta azken urteotan ikasleei laguntzeko hainbat ekimen ari dira antolatzen. Horien artean oso arrakastatsua izan da euskara barnetegia eta, hori dela eta, oraingoan ere Mallorcaren bihotz-bihotzean 48 orduz euskaraz bizitzeko aukera eskaini nahi izan die elkarteak bazkideei eta inguratzen diren lagunei.

Barnetegiaren helburua bertara biltzen direnei euskaran murgiltzeko aukera ematea da. Horretarako, euskara ikastaro trinkoaz gain, beste ekimen batzuk ere egingo dira, hala nola, txalaparta eta euskal dantza lantegiak, gastronomia ikastaroak eta lagunarteko afariak.

Hau da barnetegiaren egitaraua:

Larunbata / Dissabte / Sábado 27

-10.00 -13.30 Euskara klaseak.
-17.00 - 18.00 Sukaldaritza tailerra (behi-masailak eta euskal postre bat).
-18.00 - 20.00 Euskal dantzak.
-20.30 Sukaldaritza tailerreko platerrekin afaria eta Kantu kantari.

Igandea / Diumenge / Domingo 28

-10.00 - 13.30 Euskara klaseak.
-14.00 - 17.00 Pà amb oli.
-17.00 - 18.30 Euskal dantzak.
-18.30 - 20.00 Txalaparta.

Ekimen honez gain, euskal etxeak euskararen aldeko beste zenbait ekitaldi egin ditu azken hilabeteotan, esaterako, Korrika-18 dela eta antolatu zutena. Iragan apirilaren 13an izan zen eta elkarteak sarean jarri du bideo hau.