euskalkultura.eus

Buenos Aires, Argentina. Euskal Diasporaren Eztabaida Gunearen baitan eta 'Udalbiltzaren Diasporako Lagunak' izenpean plazaratu den oharretik mintzo dira Diasporako ekimen euskaltzale eta politikoetan arras ezagunak diren Cesar Arrondo, Mariana Fernandez Castelli eta Santiago Bereciartua (Argentina) eta Gloria Zuazola (Uruguai) --Mexikotik Alejandro Eguia-Lis emendatzen zaizkiela-- erabat ukatuz Espainiako Entzutegi Nazionalak 'Udalbiltza kasua' deitua izan den honetan auzipetutako 22 pertsonen kontra egin diren salaketak. Izan ere, "euskal hizkuntza, kultura, ongizatea, kirola, ingurumena, garapen ekonomikoa, nortasuna eta Euskal Herriari Nazio gisa dagozkion eskubideen alde" lanean dabilen erakunde baten aurkako "zanpaketa judiziala"tzat salatu dute.

Idazkiak dio aipatu epaimahai bereziaren jaurduera "zazpi lurralde historikoak uztartzeko euskal erakunde nazional baten egituratze lana aurreratzeko bidea oztopatzeko" helburuz gauzatua dela eta, izan ere' "Euskal Herriko udalen artean aitzinarazten ari ziren hainbat ekimen indargabetzeko". "Lankidetza hori Diasporako erakunde eta taldeekin ere ari zen gauzatzen, gure kasuan gehienbat euskara, euskal kultura eta identitatea eta euskal Nazioaren azkartzeari lotutako gaietan".

Auzipetuei egozten zaizkien karguak errefusatu odoren --fiskalak 10 eta 23 urte arteko espetxe zigorra eskatzen du "ETAko kide izatea" egotzita--, izkribua sinatzen dutenek "Udalbiltza hasieratik ezagutzen dugun heinean eta bertako karguetako asko pertsonalki ezagutzen ditugula, eurekin ekimen kulturzale eta abertzaleak partekatu izan ditugulako", kanpaina hau hasten dute, auziperatzea "berehala bertan behera uztea tinko eskatuta, Udalbiltza bezalako erakunde bat iraindu eta deuseztu nahi duelakoan, egin duen bekatu bakarra Euskal Herria eta Euskal Populua politikoki eta sozialki egituratu nahi izatea izan baita". Testua, osotasunean, jatorrizko gaztelaniaz, hemen.

Lotura interesgarriak

Euskal Diasporaren Eztabaida Gunea
http://forodebatediasporavasca.blogspot.com

Ezker Abertzalearen Udalbiltzaren sumarioa
http://sumarioudalbiltza.wordpress.com

Ezker Abertzalearen Udalbiltzaren webgunea
http://www.udalbiltza.net/eu/atariko/eu