euskalkultura.eus

Tres Arroyos, Argentina. Mugimendu handiko urtea izan da hau Hiru Erreka Euskal Etxeko kideentzat eta izpiritu berarekin elkartu ziren joan den abenduaren 7an urte amaierako jaia burutzeko. Gogora dezagun martxotik hona, Cañuekaseko Aberri Eguneko Dantzarien Topaketan, Union Vasca-ko Txikien Topaketan eta Rosarioko Euskal Astean hartu zutela parte euskal erakundeko dantzariek Mariana Erneta irakaslearen eskutik.

Orain, ordea, eta ziklo arrakastatsu hau ixteko, etxeko egoitza izan zen nesken taldeak hartutako eszenatokia euren pauso eta trajeak luzitzeko. Gonbidatuek mota askotako pintxoak dastatu zituzten eta afaldu ondoren dantza, karaokea eta brindisa egin zuten.

[Euskal etxeko neskak dantzan (argazkia EE)]

Urte bukaerako jaialdien baitan, eta herriko Sarmiento Liburutegiak gonbidaturik, kalean egindako ikuskizun batean ere dantzatu zuten Hiru Errekako gazte eta txikiek. Ekitaldian bertoko margolari eta idazleen erakusketa gauzatu zen eta Italiako gizataldeak eta kolektibitate euskaldunak aurkeztu zituzten euren koreografiak liburutegiaren aurrean.

Tres Arroyoseko euskara ikasleek ere izan zuten beren urteko azken topaketa; afarian zehar jokoak egin euskaraz mintzatu eta jolasteko aukera izan zuten euskara taldeko lagunek.