euskalkultura.eus

Concordia, Argentina. Concordiako Immigranteen Elkarteak antolaturik atzo igandea eman zitzaion hasiera Entre Rios probintziako Immigrantearen Jaiari. Festaren hogeigarren edizioa --irailaren 1etik 15era-- nobedade batekin inauguratu da: Suzien Martxa abiatu aurretik Argentinako eta kolektibitateen banderak aireratu ziren moto eta auto batzuek osatutako ibilgailu-kabalkada batetik.

Ekitaldia Concordiako Portuko gunean burutuko da bi asteotan programa hau garaturik:

-Irailaren 3an: Immigrantearen Eguneko Gau Ikuskizuna, Odeon Antzokian
-Irailaren 4an: Immigrantearen Eguna. Festaren 20. urteurrenean, ohorezko plaka desestaliko da Udaletxe atondoan (goizeko 10etan) eta esker-emate elizkizuna burutuko da katedralean (iluntzeko 7etan)
-Irailaren 7an: Immigrantearen Maratoia
-Irailaren 13an: Sukaldaritza Gunearen hasiera
-Irailaren 14an: Immigrantearen Festako erreginaren hautaketa eta dantza taldeen emanaldiak
-Irailaren 15ean: ohiko kabalkada ibaiertzean, sari banaketa eta jaiaren amaiera

Aipatzekoa da pasa den hilabetean festa aurreko jarduerak ere burutu zirela. Abuztuiaren 18an, larunbata, dantza ikuskizuna eskaini zuten kolektibitate guztietako dantzariek Auditorium Antzokian; abuztuaren 28tik 30era, berriz, immigrazioari buruzko Entre Rioseko jardunaldiak antolatu ziren Arruabarrena Jauregian.

Euskal etxeko erregina

Festaren XX. edizioari begira, gizatalde antolatzaileek Erreginaren Hautaketarako partaideak aukeratu zituzten. Euskal kolektibitatearen kasuan Maria Victoria Etcheverry Legarreta hautatu dute Concordiako Ibai'ko Izarra-ko lagunek ikurrina eramateko. “Maria Victoria bigarren hezkuntzako azken urtean ari da 4 zenbakiko Damian P. Garat eskolan. 17 urte ditu eta kirolari amorratua da. Eskubaloian jokatzen du CEF 4 taldean. Hain gustuko du kirola kirol kazetaritza ikasi nahi duela eskola bukatu eta gero. Euskal Etxera bere sustraiak ezagutu nahian hurbildu zen duela urte batzuk eta bertako ekintzetan partaide da”, azaldu diote EuskalKultura.com-i Ibai 'ko Izarra-tik.

[Victoria Torrea, Alejandro Casañas alkateordea eta Victoria Etcheverry, azken hau 'Euskal Herria' adierazten duen xingola soinean (argazkia Cecilia Silva Torrea)]

Bestalde, euskal gizataldearen presentzia egoki bermatzeko, janari eta dantza tipikoak ere eskainiko dituzte Concordiako Ibai'ko Izarra Euskal Etxeko lagunek jaiaren baitan. Festa honetarako prestatutako menua txorizoa sagardo erara, piperrada eta gozoak izango da. Tauletara igotzeko momentuan Lantzeko Inauteriak dantzatuko dute Gazte Lurra taldeko gazteek. Proposamen hauetaz gain, euskal kulturari buruzko informazio orokorra emateko toki bat ere bilduko du Festak.