euskalkultura.eus

Comodoro Rivadavia, Argentina. Erakundeko enbaxadore bihurtuta, euskal etxea ez ezik, euskal gizataldea bera ordezkatzen dute Comodoro Rivadaviako dantzariek euren hirian eta eskualdeko beste hainbat herritan. Eta helburu horrekin aurkeztu ziren Puerto Madryngo Italiako Elkartearen Antzokiko taulan instituzio honen mendeurreneko ekitaldien barruan.

[Askotan bezala, joan den ekainaren 22an ere aurkeztu ziren etxetik kanpo ‘Haize Dantzariak’ taldeko kideak. Oraingo hitzordua Puerto Madryn-en izan zen (argazkiaEE)]

‘Haize Dantzariak’ taldearen ikuskizunak bi zati izan zituen. Lehenengo saioan lau Arin Arin tradizional taularatu zituzten neska-mutilek; bigarrenean, ostera, Euskal Herriko koreografia modernoagoak dantzatu zituzten. Erakustaldia ekainaren 22an izan zen eta arrakasta handi kari euskal gazteek zorion agur anitz jaso zituzten.

90. urteko euskal etxea

Patagoniako zaharrenetakoa da Comodoro Rivadaviako Euskal Echea Elkartea. Izan ere, eskualdeko euskal jatorrizko etorkinak eta euren ondorengoak biltzeko asmoarekin bederatzi hamarkada daramatza bertan, euskal kulturaren alde lan egiten. Erakundearen 90. urteurrena joan den maiatzaren 20an izan zen eta ospatzeko dantzariak, abesbatzako kideak eta instituzioaren lagun minak elkartu ziren maiatzaren 25ean topa egiteko.

[90. urtemugako jaiaren irudi batzuk (argazkiaEE)]

[Euskal Echea Elkarteko lehendakaria den Antonio Baztan gazteek inguratuta (argazkiaEE)]

Urtebetetze afarian, dantza egiteaz gain, etxeko erregina aukeratu zen. Aurtengo hautatua Lara Goicoechea izan da, eta berari tokatuko zaio euskal etxea ordezkatzea irailean burutuko den Kolektibitateen Jaian. “Laura lau urterekin sartu zen euskal etxean eta denboraren poderioz dantza talde guztietan aritu izan da, txikien, ertainen eta orain helduen ‘Haize Dantzariak’ taldean”, azaldu  diote EuskalKultura.com-i Zuzendaritza Batzordetik.

[Comodoroko euskal etxeko Lagun Artean abesbatza maiatzaren 25eko Tedeum-ean (argazkiaEE)]

Egun berean, hau da, Maiatzeko Iraultzaren Egunean, hiriko kabalkadan eta Tedeum-ean hartu zuten parte euskal etxeko kideek. Elizkizunari dagokionez, ‘Lagun Artean’ izena hartzen duen etxeko abesbatzak bere errepertorio pieza batzuk eskaini zituen Argentinako Aberri Egunean.

Gernikatik Patagoniara

Euskal Etxetik azpimarratu digute, bestalde, 2013 urtea hasteko bertan zabaldu zuten Gernikari ekainitako erakusketaren arrakasta. Argentinako hainbat euskal etxe eta herrietan ikusgai egon den Gernikako Bonbardaketaren 75. Urteurrenari buruzko Erakusketa Patagoniara ere iritsi zen. Jaurlaritzak eta Gernikako Bakearen Museoak sustaturik, Erakusketa Ibiltaria otsailaren 16tik 22ra izan zen Comodoro Rivadaviako euskal elkartean. Ekitaldia komunitate osoari zuzendu zitzaion eta oso erantzun ona izan zuen herritarren artean.