euskalkultura.eus

Caracas, Venezuela. Caracaseko Eusko Etxeko mendi taldeak Paurario mendira igoera egin zuen iragan irailaren 29an. Guarico estatuko Aristides Rojas Natur Parkean dago mendi hau eta, hori dela eta, goizean goiz irten zen txangoa Caracasetik, eguna ondo probestu ahal izateko. Bidean geldialditxo bat egin zuten mendizaleek Atea deritzon gune historikoan. Venezuelako Independentzia gudan hiru bataila borrokatu ziren bertan (03/02/1814, 15/06/1814 eta 16/03/1818) eta hiruak venezuelar independentistek galdu zituzten.

Igoeran bi mendi-gidari profesionalen laguntza izan zuten Eusko Etxeko kideek: Eduardo Rojas “El Chino” eta Rainer Bostelmann izan ziren gidariak. Parkera heldu ostean, San Juango morro edo mendixketaraino bideari ekin zioten mendizaleek. Txangoa atsegina izan zen --berorik ez zuen egin, gainera-- eta Paurario mendiaren magalera heldu zirenean gidariek igoera era seguruan egiteko azalpenak eman zituzten.

[Igoera aurretik, aholkuak ematen eta segurtasun neurriak azaltzen (argazkia CaracasEE)]

[Tontorrerako bidean bista ikusgarriez gozatu zuten mendizaleek (argazkia CaracasEE)]

[Eskilara hauek izan ziren igoerako une arriskutsuena, baina inor ez zen kikildu eta aurrera jarraitu zuten denek (argazkia CaracasEE)]

"Apurka apurka eta bidean ingurune ikusgarriaz gozatzeko geldiuneak eginez, igo genituen eskilarak -batzuk petral samarrak-- eta Paurarioko tontorrera heldu ginen (1060 metro)", azaldu dio EuskalKultura.com-i Pedro Javier Arriagak. 

Mendizaleek indarrak berreskuratzeko bazkaria egin zuten, parajearen edertasunaz gozatuz. Ausart batzuk igoerarekin nahikorik ez zuten izan, antza, eta tontorreko farora ere igo ziren. 1929an eraiki zen faroa, Maracayko bidean zihoazen hegazkinei laguntzeko.

[Mendizaleak tontorrean, nekatuta baina harro (argazkia CaracasEE)]

[Faroaren tontorreraino jarraitu zuten batzuk, hori da sasoia! (argazkia CaracasEE)]

Caracaseko Eusko Etxeak txangoaren argazki bilduma argitaratu du bere Facebook-eko taldean, hemen.