euskalkultura.eus

Boise, AEB. Idaho Stampede saskibaloi taldearen joan den osteguneko partidak euskal giroa izan zuen, 'Basque Night' izeneko ekitaldia antolatu baitzuten taldeak berak eta Boiseko hainbat euskal elkartek. Gauak hasiera ederra izan zuen: Boiseko Ikastolako haurrak kantxara atera eta jokalariak agurtu zituzten bostekoa emanez. Une berezia izan zen txikientzat eta ziurrenik ez dute berehala ahaztuko. 

Ondoren atsedenaldian Patxi Kerns dantzaria atera zen kantxara eta aurreskua dantzatu zuen. Kerns Oinkari taldeko kidea da eta Lazkaoko barnetegian euskara ikasle ibilitakoa ere bada. Gero Oinkariko zortzi dantzari atera ziren, neskak eta mutilak, eta beste euskal dantza bat eskaini zuten. Oinkari 50. urteurrena ospatzen ari da aurten eta AEBetako euskal dantza talde garrantzitsuenetakoa da. 750 dantzari pasa izan dira Oinkaritik urte hauetan. Euskal Gaueko sarreren prezioa 12 dolarretakoa izan zen, ohi baino merkeago, eta sarrera bakoitzeko 5 dolar Idahoko euskal elkarteen finantziazioan laguntzeko erabiliko dira.