euskalkultura.eus

Geneva, Suitza. Ediziotik ediziora gero eta leku gehiagotara heltzen ari da Korrika eta aurtengoak, 18ak, muga berriak hautsi ditu. Esaterako aurten Genevara heldu da, hiriko euskaltzale talde bati esker, eta egitarau mardularekin, gainera. Jarduerak martxoaren 20eran hasi ziren, "Bertsolari" filmaren emanaldiarekin. Amets Arzallus bertsolaria gonbidatu zuten antolatzaileek, bertsolaritzari buruzko solasalditxoa egiteko. 

Biharamunean, zinea izan zen berriz ere protagonista, "Apaizac Obeto" dokumentalaren emanaldiari esker. Xabier Agote errealizadoreak aurkeztu zuen filma. Ostiralean, martxoaren 22an, 60 bat lagun bildu ziren Le Consultant kafean egin zen euskal festara. "Genero eta garai guztietako euskal kantak egon ziren, gitarraz eta DJaz lagunduta", azaldu digu antolatzaile taldetik Beñat Ralla Yustak.

[Amets Arzallusek "Bertsolari" dokumentala aurkeztu zuen Uni-Mail-en (argazkiak BRalla)]

Larunbatean, martxoaren 23an, izan zen egun handia eta Korrika 18 Genevako kaleetaraino heldu zen. Giro alaian, bizi-bizi ibili zen lasterketa.

[Genevako euskaltzaleak Korrika egunean (argazkia BRalla)]

Amaitzeko, hona Arzallusek bota zituen bertsoak, Genevatik munduko euskaldunei eskainiak:

"Euskal Herria izan daiteke Miarritzen naiz Tuteran,
Paris mintzo da zubereraz ta, Boise Bizkaiko hizkeran,
ama hizkuntzak erditzen gaitu nonahira euskaldun eran,
ta lekukoak segitzen badu eskutik eskura hegan,
Euskal Herria, portu berria, izango duzu Genevan".

Argazki gehiago ekitaldiaren Facebook orrian, hemen.