euskalkultura.eus

Londres, Ingalaterra. Londresko Euskal Etxeak bertso-bazkari batekin bukatu zuen aurten egin duen 'Euskal Uda'. Elkarteko hainbat kide bildu ziren Bethnal Green auzoko euskal etxearen egoitzan Amets Arzalluz hendaiarraren eta Jokin Uranga azpeitiarraren saioa entzuteko. Ordubietako zegoen jarrita bazkarirako hitzordua, baina azkenean bertso-bazkaria bertsolaririk gabe hasi behar izan zuten: euskal etxera heldu  baino lehen kartera (eta bertan pasaporteak eta dirua) lapurtu zizkieten taberna batean eta Amets eta Jokinek kontsulatura joan behar izan zuten lapurreta salatzera.

Azkenean 5ak aldera iritsi eta bazkaldu ondoren bertsolariek 'bertso-bazkaloste' ederra eskaini zuten eta gai zentrala, noski, eguneko abenturak eta lapurreta izan ziren. Ondoren bertsolariek hara bildutako lagun bakoitzari bertso bana bota zieten, Londonen zergatik ote zeuden asmatu nahian. Basque Society ko kideek EuskalKultura.com-i adierazi diotenez, saioa "oso dibertigarria izan zen eta jendeak barre asko egin zuen".

[Londoneko Euskal Etxean egin zen bertso-bazkariaren irudi bat (argazkia London EE)]

[Amets Arzalluz eta Jokin Uranga bertsolariak London Basque Societyko kideekin (argazkia LondonEE)]

Bertsolariak "oso inpresio onarekin gelditu ziren" eta esker oneko hitzak izan zituzten antolatzaileentzat. "Bueltatzeko asmoa eta gogoa ere agertu zuten, ea ba hurrengo urtean beste bat antolatzen dugun!", azaldu dute Basque Society-ko arduradunek.