euskalkultura.eus

Donostia-San Sebastián. Basque Culinary Center-ek nazioarteko bira abiatuko du bihar; "World Tour-Culinary Connection" izena jarri diote urte osoko birari eta bere baitan 2013an zehar Brasil, Kolonbia, Txina, Errusia, Singapur eta Txilera joango dira BCCrekin lankidetzan ari diren hamaika sukaldari. Egitasmoaren helburua nazioartean sukaldarien artean hartu-emanak sortzea da.

Biraren lehendabiziko etapak Brasileraino eramango ditu bihar Elena Arzak, Rodrigo de la Calle eta Andres Conde sukaldariak. Eurekin batera Brasilen izango da baita ere Joxe Mari Aizega, Basque Culinary Center-eko zuzendaria. Sao Paulon Alex Atala chefak, Dom jatetxeko buruak, hartuko ditu. Dom Restaurant munduko laugarren jatetxe onena da, 2012ko Restaurant aldizkari britainiarraren zerrendaren arabera.

Igandean BCCko ordezkaritzak Brasilgo sukaldaritza eta gastronomia arloetan interesgune diren zenbait leku bisitatuko ditu. Astelehenean egingo dira bidaiako ekitaldi nagusienak: goizean Basque Culinary Center-en aurkezpena eta lantegi praktikoak egingo dira SENAC-en, eta jarraian, arratsaldean, Jose Mari Aizegak brasildar sukaldari talde batekin bilera egingo du. Gauean, bidaiari bukaera emanez, gonbidatuentzako ekitaldi berezi bat egingo da.

Lehenengo irteera honen ostean, eta nazioarteko bira-saio honen barruan, beste bidaia sorta bat etorriko da urtean zehar, aipatu herrialdeetara, sukaldariak aldi bakoitzean aldatuz, xehetasunak irteera bakoitza hurreratzen joan ahala adieraziko direla, BCCko iturriek esan digutenez.

Elena Arzak donostiarra nazioarteko sukaldaritza panoramako izen garrantzitsu eta hazkorra da. Bere familiaren jatetxean hasia aita Juan Mari Arzak maisu zuela, geroztik ibilbide propio eta sendoa ibilia du. Iaz, Munduko Chef onena, emakumeen sailean, izendatu zuen Veuve Clicquot-ek, Restaurant aldizkariarekin batera.