euskalkultura.eus

Olavarria, Argentina. Urtarrilaren 13an inauguratu zen Olavarrian ‘Corsodromo’ delako gune berria eta Inauteria bera. Lekua 500 metro luze da eta herriko Eva Peron parkean dago. Bertan bildu ziren 80 bat instituzioko ordezkari, konpartsak, murgak, karrozak eta oro har inauteriak ospatu nahi zituzten milaka lagun, 2013ko jaia abiatzeko.

Festa erraldoiko protagonisten artean euskal komunitatea zegoen Euskal Herriko irudi eta paisaia tradizional batzuk Buenos Aires probintziaraino ekartzen. Izan ere, 2013 honetan baserri itxurako karroza batean ibili ziren Gure Etxe Maitea-ko kideak Corsodromo berrian zehar.

[Buru belarri ibili ziren Olavarriako Gure Etxe Maitea-ko kideak euren karroza prestatzen... barre algara batzuk egiteko denbora ere izan zuten (argazkiakEE)]

‘El Olentzero’ delako karroza mendi paisaia batekin dago apainduta eta, mendi artean, baserri baten irudia. Landare, lore eta harriek osatzen dute eszena. Aurkezpenean, gurditik, gainera, Olentzero eta bere lagunek gozokiak banatzen dituzten umeen artean. Karrozarekin batera, janari tipikoak ere eskaintzen dizkiete euskal etxeko kideek Corsodromora bertaratzen diren bisitariei.

[Ahaleginak bere saria izan zuen; euskaldunak 'Olentzero' izeneko euren karrozan ibili ziren Cosmodromo berrian (argazkia)]

Gogora dezagun hau ez dela Gure Etxe Maitea euskal etxeko lagunek herriko Inauterietan izaten duten lehenengo agerraldia. Iazko jaialdian, gainera, bigarren saria irabazi zuen euskal gizataldeak bere euskal karrozarekin.