euskalkultura.eus

euskal diaspora eta kultura

Albisteak rss

Argentinako Udako Euskal Unibertsitateak bihar emango dio amaiera lehen edizio 'oso baikor' bati

2009/02/19

Euskal Historia klasea Pedro Beramendirekin, Euskal Echea institutuaren Buenos Aireseko egoitzan
Euskal Historia klasea Pedro Beramendirekin, Euskal Echea institutuaren Buenos Aireseko egoitzan

PUBLIZITATEA

Bihar bukatuko da Argentinako Udako Euskal Unibertsitatearen lehen edizioa, joan den otsailaren 9az geroztik Euskal Echea institutuaren Buenos Aireseko egoitzan eman diren doako ikastaro bereziei amaiera emanez. '44 lagunek eman zuten izena ikastaroetara eta horietatik 25 bat etorri dira klase guztietara', azaldu du ikastaroen sustatzaile izan den Enrique Aramburuk. Haren esanetan klaseetako giroa oso jatorra izan da eta ikasleek aintzat hartu dute irakasleek mintzaldiak prestatzeko egin duten lana. Aurtengo edizioaren arrakastak animatuta, arduradunek datorren urtean edizio berri bat egitea dute buruan jada.

Buenos Aires, Argentina. Argentinako Udako Euskal Unibertsitateak bihar itxiko ditu bere lehenengo edizioko ateak, bi aste hauetan ikastaroak burutu dituzten ikasleei tituluak banatuz. Esperientziarekin oso pozik agertu dira ikasle zein irakasleak, eta Enrique Aramburuk EuskalKultura.com-i adierazi dionez, datorren negurako (hego hemisferioan abuztuan da negua) antzeko zerbait baina txikiagoa prestatu nahi dute eta ezbairik gabe Udako Unibertsitatearen bigarren edizioa egin nahiko lukete datorren urtean.

'Azken balioespena oso oso baikorra da', azaltzen du Enrique Aramburu. 'Ikasle gehienak Buenos Airesetik etorri dira, eta batzuk La Platatik, San Nicolasetik eta baita mila kilometrotara dagoen Chubutetik ere. Doako ikastaroa izanik, batzuk izena eman zuten nahiz eta jakin ezingo zirela klase guztietara etorri. Ez da erraza udan ikasleak klaseetan interesatuta mantentzea, baina aintzat hartu dute irakasleek egin duten lana, klaseak euren aisialdian prestatuz eta batzuk barnealdetik etorriz mintzaldia emateko'.

Universidad Vasca de Verano de Argentina 2009 (01)

[Euskara klaseen arduradun izan den Belen Girasol Argentinako Udako Euskal Unibertsitateko ikasleetako batzuekin mintzatzen]

Irakasleen engaiamendua

Irakasleen parte hartze eta engaiamenduari zor zaio egitasmoaren arrakastaren zati handi bat, antolatzaileen esanetan. Dozena bat irakaslek parte hartu dute ikastaroan, denak bolondres. Lehenengo astean euskal gai desberdinei buruzko mintzaldiak eman zituzten, eta bigarrenean lau ikastarotan sakondu zuten: Euskal Historia, Euskara, Euskal Erakundeak eta (hautatzeko) Antropologia edo Euskal Ekonomia.

 

Universidad Vasca de Verano de Argentina 2009 (02)

[Ikastaroetan parte hartu zuten ikasleetako batzuk Gernikako Arbolaren kimuaren pean, Euskal Echea Institutuak Llavallolen duen egoitzara egin zuten bisitan]

Pedro Beramendik Historia klasea eman zuen, Belen Girasolek Euskara, Eduardo Torryk Euskal Erakundeak, Leandro Etchichuryk Antropologia, Valentín Galardik Ekonomia, Itziar Agirrek Gastronomia, Jose Gutierrezek Musika, Cesar Gogorzak Mitologia, Nieves Castillo Alzurik Geografia, Mikel Huget Ormaetxeak Dantza, Javier Clúak Kirolak, Pedro Tenti Alberdik Heraldika eta Enrique Aramburuk Zuzenbidea. Mikel Ezkerro hizlari eskarmentudunak Historia klase bat eta irekiera mintzaldia eman zituen, eta bera izango da bihar bukaera mintzaldia emango duena.



« aurrekoa
hurrengoa »

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia