euskalkultura.eus

La Plata, Argentina. Aire Aire Trikitixa taldea duela bederatzi urte inguru jaio zen Astigarragako Norberto Almandoz Musika Eskolaren inguruan. Zazpikote honen lanak euskal musika tradizionala suspertu eta zabaltzea hartzen du oinarri, eta horregatik trikitixa, panderoa eta egurrezko koilarak erabiltzen dituzte. Euskal tresna hauek lagunduta abestu eta dantzarako betiko doinuak jo ohi dituzte gazte euskaldunek. Joera horri eutsiz, Argentinako euskal etxeetan ere Euskal Herriko jai giroa sortu zuten uztailaren lehenengo asteetan.

[Aire Aire Trikitixa taldeak Euzko Etxea-ko Toki Alai aretoan jo zuen (argazkia EE)]

“Argentinara etortzeko proiektua iaz Txilen egindako bira musikaletik atera zen”, -- azaldu zion taldeko kidea den Amaiur Alkain-ek EuskalKultura.com.i --. “Taldekideei esan nien Argentinar ezagun dezente nituela eta, La Platako Euzko Etxea euskal etxea ezagutzen nuenez, hurrengo urtean diru apur bat lortuz gero, Argentina aldera ere etor gintezkeela. Orain esan dezakegu -- jarraitzen du trikitilariak -- Argentinan nahiz Txilen izandako emanaldiak oso aberasgarriak izan direla, bereziki gure sustraietako musika folklorikoarekin horren urrun bizi den jendea betetzea zaila delako. Gainera 14.000km-tako distantzi batean halako bizipenak izatea, euskal kulturaren inguruan beti ere, eta hainbat euskal etxe ezberdinetako ikuspuntuak eta inguruak ezagutzeko parada izatea paregabeko esperientzia izan da guretzat”, adierazi zuen Astigarragako neskak.

[Euzko Etxeako kideek dantza egin zuten talde gonbidatuarekin (argazkia EE)]

Taldea oso momentu egokian Argentinaratu zen. Izan ere, kide gehienak uztailaren 7an iritsi ziren eta La Platako Euzko Etxean San Fermin Jaian parte hartzeko aukera izan zuten. Egun horretan euskal etxetik kanpo nahiz egoitzan bertan egindako ekintzetan jo zuen Euskal Herriko taldeak. Ondoren, uztailaren 10ean, berriro ere euren musika tresnak zorrotik atera zituzten beste kontzertu bat emateko. Bi kasuetan bildutako publikoak dantzarako eta abesteko oso aukera polita izan zuen.

[Euskaltzaleak-en afari bat partekatu zuten euskaltegiko lagunekin taldeko musikariek (argazkia EuskalKultura.com)]

Une ezin hobea izan dela esan dugu, argentinarrak neguko oporrez gozatzen ari zirelako; beraz, alaitasuna gailendu zen leku guztietan. Buenos Airesko Euskaltzaleak-eko kideek ere besoak irekita hartu zuen Astigarragako taldea. Mexico kalean dagoen etxean eta uztailaren 16an, Aire Aire Trikitixa-ko kideek erromeria batean hartu zuten parte. Euskara ikasle, irakasle eta erakundeko lagunek ez zuten dantzatzeko eta kantatzeko aukera galdu. Parranda ordu txikiak arte luzatu zen.

[Musikariak jotzen hasi ziren bezain pronto bildutako jendeak dantza egiteari ekin zion (argazkia EuskalKultura.com)]

Zazpikote astigarragatarrak bisitatu zuen azken euskal etxea, General Rodriguezko Eusko Aterpea izan zen. Hor, uztailaren 17an, beste errezital bat eman zuten trikitilariek. Bertako jendea alai baino alaiago ibili zen maila hgarai honetako artistak ikusteko aukera izateagatik.