euskal diaspora eta kultura
2012/02/27
Stanford-eko euskara ikastaroko ikasleek gelan proposatutako gaien gainean jardun zuten kantuan Amets Arzallus, Julio Soto eta Johny Curutchet bertsolariak iragan otsailaren 21ean unibertsitate ospetsu honetan egin zen saioan. Ekitaldia berezia izan zen, ez soilik unibertsitate honetara lehen aldiz bertsoak ekarri zituelako, baizik eta bertan Euskal Herriko eta Estatu Batuetako bertsolaritza tradizioak aritu zirelako buruz buruz. Stanfordeko euskara irakasle Iñaki Lopez de Luzuriagak aurkeztu zuen ekitaldia eta saioaren osagai gisa, bertsolariek ingelesez eta euskaraz erantzun zituzten entzuleen galderak.
2012/02/27
Mexikoko Euskal Etxeko zuzendaritzak, Lourdes Arrechea lehendakaria buru duela, 2012an zehar elkarteko euskara eskolak sustatzeko eta indartzeko apustua egin du eta lan eskerga ari da egiten helburu hori lortzearren. Elkarteak hiru maila eskaintzen ditu eta irakasleak Gurutzne Etxeberria amezketarra, Nerea Basterretxea bermeoarra eta Gabriel Ceballos mexikarra dira. Eskolak emateko ordenagailu gela berritu egin du euskal etxeak, eta ikasleak elkartzeko bilgune bat ere egokitu du. Ikasle kopuruak gora egin du jada, eta izena emateko epea irekita dagoela gogorarazten du Lourdes Arrecheak.
2012/02/27
Urtea aurrera doa eta pixkanaka mugimendua handituz doa Argentinako euskal etxeetan ikasturte berriari begira. Euskal etxe askotan martxoan ekingo zaie euskara klaseei; beste batzuetan apirilean bueltatuko dira ikasle eta irakasleak ikasgeletara. EuskalKultura.com-ek interesatuen esku jarri nahi izan du eskolen ordutegi eskaintza eta informazioa osatuz joango da argibideak heldu ahala. Hona Arrecifeseko Euskaldunak Denak Bat, Buenos Aireseko Euskaltzaleak eta Eusketxe, Cordobako Gerora, Gral. Rodriguezeko Eusko Aterpea, Rosarioko Zazpirak Bat eta San Nicolaseko Euskal Etxea euskal etxeetako euskara klaseen zehaztasunak.
2012/02/24
Zinema argentinarreko Institutuak [INCAA, Instituto Nacional de Cine y Artes Audiovisual] Maximiliano Gonzalez-en bi proiektu saritu ditu otsail hasieran. Bietako bat Guillermo Larregui 'Eskorgako Euskalduna'ri buruzko (El Vasco de la Carretilla, gaztelaniaz) dokumental bat da eta irail aldera ikusi ahal izango da Argentinako Telebista Digital berrian. “Puerto Iguazukoa naizenez oso txikitandik ezagutu nituen Guillermo Larreguiren pasadizo eta bizipenak. Eta bere nortasunetik gauza ugarik erakarri ninduten; egin zuen ahalegin fisikoaz gain, ametsak eta askatasuna lortzeko gizakiaren borroka nahi ditut gailendu”, adierazi dio Misioneseko zinemagileak Euskalkultura.com-i.
2012/02/24
Julian Celaya, Eusko Jaurlaritzaren Kanpoko Euskal Herritar eta Gizataldeentzako zuzendaria, Argentinan da, astelehena arte luzatuko den bidaia ofizialean. Bisitaren baitan bihar Arrecifesen bertako Euskaldunak Denak Bat Euskal Etxearen 90. urteurrena ospatzeko ekitaldietan hartuko du parte. Elvira Kortajarena, Euskadiko ordezkaria Mercosur-erako, ere bertan izango da, Eusko Jaurlaritzaren ordezkaritza osatuz. Gaur Celaya eta Kortajarena espainiar enbaxadako Enplegu eta Segurtasun arduradunarekin bilduko dira. Enbaxadako sail honek kudeatzen du gizarte eta gizataldeen arloa, Buenos Airesko Ordezkaritzako iturriek EuskalKultura.com-i azaldu diotenez.
2012/02/24
Eusko Kultur Etxeak, edo Buenos Airesen 'Casa de la Cultura Vasca' edota 'Eusketxe' gisa ere ezaguna den elkarteak udako opoirren aurretik ekin zion Urteko Ohiko Batzar Nagusiari eta bertan Zuzendaritza Batzordea berritzeko bozak gauzatu zuen, epe berri honetan Maria Elena Etcheverry de Irujo Ollok segituko duelarik elkarteko lehendakari, batzordekide dituela, besteak beste Aitor Alava, lehendakariorde gisa; Maria Echevarne, idazkari; Victor Girasole, idazkariorde; Rosa Isabel Misciagna, diruzain; eta Maria Raquel Bidegain, diruzainorde.
2012/02/24
Inauterietako euskal ohiturak eta mozorroak Quebec-eraino heldu dira aurten, Euskaldunak elkarteari esker. Iragan otsailaren 11n Quebec-eko euskal komunitateak Aratusteak ospatzeko jaia egin zuen Montrealeko egoitzan eta eguneko argazki sorta bidali diote EuskalKultura.com-i, gure irakurleekin partekatzeko. Elkarteak haur eta helduentzako eskulan tailer batekin hasi zuen gaualdia eta mozorroak eta txanoak egin zituzten parte hartzaileek. Ondoren, Euskal Herriko inauteriei buruzko hitzaldia eman zuen Adelaide Daraspek, elkarteko presidenteak.
2012/02/23
Boise State University-ko Euskal Ikasketa Programak Ama Hizkuntzen Eguna ospatu zuen atzo, "AEBetan euskaraz errodatu den lehen filmea"ren emanaldiarekin. Zuretzako du izena luzemetraiak eta Javi Zubizarreta boisetarrak zuzendua da. Idahon artzain dabilen euskaldun baten eta bere semearen arteko harremana da filmearen muina. Zuzendariak berak aurkeztu zuen lana eta ondoren ikusleekin solasaldi bat gidatu zuen Joseba Gabilondo zinema adituak. Ama Hizkuntzen Eguneko ekimenak osatuz, Erausoko Katalinari buruzko hitzaldia emango du bihar Basque Museum-en Eva Mendieta unibertsitate irakasleak.
2012/02/23
Silvia Azpiazu euskal-argentinarra da, Lapridakoa, eta bertoko Lagunen Etxea-n euskal bitxigintza kontzeptualari buruzko tailer bat eman zuen iaz. Aurten ikastaroaren bigarren zikloa eskainiko du eta iazko eskoletako parte-hartzaileek egindako piezak martxoaren 24an erakutsiko ditu Coronel Pringles-eko Eusko Biltzar Euskal Etxean. Egiten ikastea baino, bitxiak oparitzeko prest eskuratu nahi dituztenentzat, internet bidez eros ditzakete bere euskal bitxiak edo, zuzenean, Buenos Aires hiriburuko Virrey Loreto kaleko 2650 zenbakian daukan lantegian.
2012/02/23
Argentinako Buenos Aires probintzian, zuzendaritza berritu du San Nicolaseko Euskal Etxeak. Araudiak finkatutakoari jarraiki egindako Urteko Ohiko Batzarrean Damian Cebey berrautatu dute lehendakari. Berarekin batera arituko dira besteak beste José Alejo René Mariezcurrena, lehendakariorde; María de los Ángeles Domenech, idazkari; María Elena Totorica, idazkariorde; María Teresa Aramburu, diruzain; Ana María Erausquin, diruzainorde; eta María Teresa Aramburu, agirietako idazkaria.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
