euskal diaspora eta kultura
2012/03/15
Ikasturtearen hasierarekin batera, Argentinako Cordobako Gerora elkarteko kideak bueltatu dira aste honetan ikasgeletara. Uspallata kaleko 115. zenbakian dagoen egoitzan, euskal kulturarekin lotura duten hainbat aukera eskaintzen dizkiote euskal erakunde berriko arduradunek komunitateari cordobatar osoari, tartean euskara klaseak, musika eta dantza tailerrak eta sukaldaritza gunea. Elkarteko aktibitateak berrabiatu diren honetan, Baietz musika taldeak entseguekin eta bere diskoaren aurkezpenekin jarraituko du urte osoan.
2012/03/14
Santiagoko Euzko Etxeak ehun urte beteko ditu aurten eta, Mendeurreneko ospakizunen egitarau ofiziala oraindik aditzera eman ez bada ere, hasi dira jada giroa berotzen. Bihar bertan goi mailako euskal gastronomia dastaketa egingo da euskal etxean, Bizkaiko lau sukaldari ezaguneri esker (bik Michelin izardun jatetxetan egiten dute lan). Ekitaldia Bizkaiko Foru Aldundiarekin lankidetzan antolatua izan da eta berarekin Aldundia egunotan Txilera egiten ari den merkataritza misioari bukaera biribila emango zaio.
2012/03/14
2012ko martxoa da eta Txileko hiriburuko euskal komunitatea urtebetetze jaietan dabil, ehun urte betetzen ari baita martxo honetan Santiagoko Euzko Etxea. Urte osoan zehar ospatzekotan da. Bihar bertan egingo duen 'Euskal Jaia' delako batetik abiatuta, Euskal Herritik etorri diren lau sukaldari bizkaitar hautu protagonista, euskal gastronomia eta kulturari eskainitako ekitaldian. Izan ere, hain aukera berezia partekatzeko eta Txilen industria, merkataritza eta turismo arloan lor daitekeen lankidetza ikertzeko Santiagon da ordezkaritza bizkaitar zabal bat, bertako Foru Aldundiak eratua. Txileko euskal etxe dekanoaren historiaz gehiago jakitearren, gainbegirada bat eskatu diogu Pedro Oyanguren EEko artxibozain eta betidaniko kideari.
2012/03/14
Arrakastatsutzat jo du Kaliforniako Santa Barbara Unibertsitateak iragan martxoaren 2an Arkaitz Moreno irakasleak bertan eman zuen herri kirolei buruzko mintegia. Bi zati izan zituen ekitaldiak: batetik, herri kirolei buruzko hitzaldi klasikoa; bestetik, taller praktikoa. Bigarren zati honetan entzuleak patiora irten eta proba desberdinetan lehiatu ziren; ohiko aurkezpenez oso bestelakoa izan zen eta biziki gozatu zuten partaideek probalarien lekuan jartzeko aukera hau. Ekitaldiak lortutako harrera ona dela-eta datorren urtean errepikatzeko asmoa agertu dute Santa Barbara unibertsitateko arduradunek eta, are gehiago, Bakersfield eta Boisekoan ere egiteko aukera ari dira aztertzen.
2012/03/14
Eskualdeko festa garrantzitsuenetakoa da 'Moxalaren Jai Nazionala' eta urtero burutzen da otsail amaiera aldean Buenos Aires probintziako Coronel Vidal hirian. Izatez Harro euskal etxean bildurik, bertoko euskaldunek gero eta parte hartze handiagoa dute denboraren poderioz euskal kultura zabaltzeko hitzordu ezin hobea bihurtuz joan den herri topaketa honetan. Bukatu berria den 34. edizioan, Fernando Mandagaran-ek zuzentzen duen erakundeko standa, euskal etxeko kide eta bisitarien arteko topagunea izan zen, Euskal Herriari eta euskal argentinarrei buruzko informazioa trukatzeko. EEaren aldizkaria opari jaso zuten bertoratu zirenek.
2012/03/13
Buenos Aireseko Laurak Bat-en egoitzan sortu bazen ere, Euskaltzaleak “independente, autonomo eta garrantzi handiko helburu batekin jaio zen: euskara, euskaldunen nortasunaren eta izaeraren erroa, zaintzea”, dio euskaltegiaren sorrera-agiriak. Kari horretara, eta euskara Argentinan ahalik eta ondoen irakatsi, landu eta hedatzeko, erakundeko lagunek ahalegin handia egin dute azken bolada honetan Euskaltzaleak-ek bere etxe propioa izan zezan. Buruhausteek, baina, fruituak eman dituzte eta otsailaren amaieratik erakundeak berea den etxea du, Bernardo de Irigoyen kaleko 826. zenbakian (B. de Irigoyen eta Independencia), Obeliscotik hamar bat kaletara.
2012/03/13
Tarte berezia eskainiko dio aurten ere euskal zineari ostegunean hasiko den Nanteseko Zinemaldiak, "La Fenêtre Basque"edo Euskal Lehioa zikloaren baitan. Jaialdiaren 22. edizioa etzi abiatuko da eta martxoaren 25a arte luzatuko. Edizio honetako izarretako bat, Alex de la Iglesia zuzendari bilbotarra izango da eta zinemaldiak sail berezia eskaini dio. Horrez gain "Bernardo Atxaga zineman" izeneko atalean idazle gipuzkoarraren eleberrietan oinarrituta egin diren hiru luzemetraiak eskainiko dira: Montxo Armendarizen "Obaba", Imanol Rayoren "Bi anai" eta Aizpea Goenagaren "Zeru Horiek".
2012/03/12
Eusko Jaurlaritzak argitara eman du Kanpoko Euskal Gizataldeen eta Euskal Etxeen eremuan trebatzeko deitu zituen lau beketako selekzio prozesuan aurrera egin duten pertsonen zerrenda. 45 dira onartutako hautagaiak eta 16 baztertutako eskabideak. Beketako bi Jaurlaritzan Gasteizen, beste bat Argentinan eta laugarrena Estatu Batuetan aritzeko dira. Hona bildu ditugun onartu eta baztertuen zerrendetan Euskadiko zein Diasporako partaidean agertzen dira, ohi bezala Euskadiko zein Diasporako pertsonek legez eskubide berdina baitute parte hartzeko.
2012/03/12
Zenbait ekintza eskainiko dira urte osoan zehar Laurak Bat Euskal Etxean, munduko euskal etxea zaharrena den honen 135. urteurrena ospatzeko. Urtebetetzearen eguna, bihar da eta bihar egingo da ekintza nagusia. Iluntzeko 7etan, Lagun Onak abesbatzak kontzertua eskainiko du euskal etxearen omenez eta ondoren gaur egungo arduradunek Etxeak izan dituen lehendakari guztiak gogoan izango dituzte urtemuga zeremonian. Ospakizunarekin jarraituz, martxoaren 16an Itziar Aguirre sukaldari euskal-argentinarrakak “Pilpileando Argentina” programaren emanaldia eskainiko du Belgrano kaleko euskal elkartean.
2012/03/12
Martxoaren 22tik 25era Panaman egingo den Arte Eszenikoen 5. Nazioarteko Jaialdian izango da Kulunku Teatro konpainia gipuzkoarra "André & Dorine" antzezlan arrakastatsua aurkezten. Alzheimer-ari eta maitasunari buruzko hausnarketa hunkigarria da lana eta hitzik gabe antzezten dute aktoreek, maskarak jantzita. "Hitzik ez dugu erabiltzen eta, paradoxikoki, horrek lana edonon ulergarri izatea dakar; Kuban zein Nepalen", azaldu dio EuskalKultura.com-i Kulunkako Garbiñe Insausti aktoreak. Azken urtean gelditu gabe ibili da taldea nazioartean eta, antza, horrelaxe segituko du aurten ere: Panamaren ostean Turkia, Errusia, Finlandia, Norvegia, AEB, Txina... etorriko dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
