euskal diaspora eta kultura
2008/02/08
Nafarroako Gobernuko Hezkuntza Sailak emango dituen zortzi beka hauek bi hartzaile talde ezberdin edukiko dituzte: Nafarroako unibertsitate batean ikasi nahi duten nafarren ondorengoak, eta atzerrian UNEDen (Universidad Nacional de Educación a Distancia) elkartekidea den zentro batean ikasketak egin nahi dituzten nafarrak edo ondorengoak. Dirulaguntzak hamar mila eurokoak izango dira gehienez.
2008/02/08
Hego Euskal Herriko lanbide askok ez dute bertan langilerik aurkitzen eta askotan Espainiako estatutik kanpo eskatu behar dituzte. Nafarroan, adibidez, erregistratuta dauden 303.100 langileak, tartean lurraldeko 13.300 langabeek, ez dira nahikoak "okupazio zailekoak" bezala deitzen diren lanpostuak betetzeko. Araban 52 dira 'betetzen zailtzat' jotzen diren lanbideak. Bizkaian 33, eta Gipuzkoan 46. Iparraldeko daturik ez dugu momentu honetan.
2008/02/08
Betidanik egin nahi izan zuen Iratxe Ormatzak horrelako bidaia bat. Bere neba Hego Amerikan zegoen eta harek eman zion falta zitzaion azken bultzada. Irailean pentsatu eta azarorako bere nebarekin elkartu zen Perun. Ormatzak euskalkultura.com-eri adierazi dio jadanik ez zuela uste hogeita hamabi urterekin horrelako esperientziarik bizitzea baina lana eta etxea Euskal Herrian utzita, aurreztutako sosak hartu eta abenturara abiatu zen 2003an. Lekuan lekuko esperientziak eta ikusitakoak eragindako zirrara azalduko ditu bidaia-liburu honetan.
2008/02/07
Argentina uda garaian dago momentu honetan, baina beroak ekar dezakeen nagikeria ez da batere nabaritu bukatu berria den urtarrilean Necochean. Izan ere, zenbait euskal ekintza ospatu dituzte euskal necocheatarrek joan den hilean, tartean Kolektibitateen Azoka eta San Sebastian eguneko danborrada eta jaiak. Gipuzkoako hainbat herri eta hirietan ospatzen den sansebastian oso hitzordu berezitzat hartua dute Necocheako euskaldunek. Danborrak eta barrikak soinean, argentinar kostaldeko hiri honetako kaleak animatzen dituzte urtero.
2008/02/07
Uruguaitik eta Argentinatik etorritako 23 lagun hango euskal etxe eta unibertsitateetan euskara irakasle izateko trebatzen ari dira Lazkaoko (Gipuzkoa) Maizpide barnetegian. Euskal Herriko komunikabideak, euskarazkoak gehienbat, etengabe ari dira Lazkaora hurbiltzen, Diasporako seme-alaba diren hauen euskaltzaletasuna ulertu nahirik. Maitasun istorioak dira gehienak, norberaren erroekiko, familiarekiko maitasun istorioak, bizipen pertsonalenekin lotuak. Erroak fruitua ematen, jende gaztea baitira Ameriketatik etorritako euskaldunok. Ainara Arratibelen artikulu hau Berriak eman zuen argitara joan den igandean.
2008/02/07
Antzerti aldizkaria nahitaezko erreferentzia da euskal antzerkigintzaren historian. 1932ko urtarrilean sortua, ia 50 urteko etenaldia izan zuen 36ko gerraren ondorioz. Antzerti Eskolaren ekimenarekin batera berriro argitaratu zen eta beste 29 ale kaleratu zituen 1982tik 1985era. Orain, Armiarma.com-ek zenbaki guztiak jarri ditu irakurlearen esku sarean. Bertan aldizkariak argitara emandako 64 aleak topatuko ditugu, tartean 47 idazlek idatzitako 74 obra. Zer taularatu nahi duenarentzat altxor polita.
2008/02/06
Eusko Jaurlaritzak, Kataluniako Generalitateak eta Galiziako Xuntak 'Pariseko Adierazpena' deitu duten agiri bat aurkeztuko dute ostiral honetan Parisen hizkuntz aniztasunaren alde. gaur bertan hasi eta datorren larunbatera arte hiriburu frantsesean egingo den Expolangues azoka aukeratu dute horretarako, hizkuntzak, kultura eta trukea ardatz hartzen dituen aretoa. Euskararen ordezkaritza bertan, Jaurlaritzak Pariseko Eskual Etxearekin batera ipinitako standak eta Euskararen Nafar Institutuak, iaz sortua izan eta gero lehenengo aldiz ipiniko duenak izango dute.
2008/02/06
Miguel Sanz presidentea buru AEBetako IV. Nafar Astean parte hartzen ari den ordezkaritza instituzionalak Miamin antolatutako programazio zatiari amaiera eman zion atzo Coral Gableseko Merkataritza Ganberan eginiko bilerarekin, gaurko saioan eta beste bi egunez New Yorkera pasatzeko. Floridan egon den bitartean, Sanzek hainbat bilera instituzional, ekonomiko eta kultural izan ditu; halaber, sostengua eman die beren produktuak sustatzen dabiltzan Nafarroako hogei enpresei.
2008/02/06
Hitz-mitz telefono mugikorretarako jokua Euskal Herrian edota diasporan dagoen edozein pertsonak lor dezake. Europako Euskal Herritik, doan jaitsi daiteke mezu baten bidez. Esaterako Ameriketan bizi diren euskaldunek internet duen telefono mugikor batetik egin beharko dute. Euskara ikasteko edo praktikatzeko balio dezakeen joku honek helburu bikoitza du: erabiltzaileak dituen euskal gramatika, musika edo atsotitzei buruzko ezagutzak ebaluatzea; eta entretenimendua bultzatzea. Horretarako, puzzle izaerako funtzionamendua erabiltzen du erantzun bakoitza aukeratu aurretik estrategia aztertzeko.
2008/02/05
Santa Ageda Idahoko Boiseko Euskal Etxeraino iritsi da aurten. Iragan urtarrilaren 26an, ia laurehun pertsonaren aurrean, dozena bat haur eta helduk egun berezi honetako koplak kantatu zituzten jendeak afaltzen zuen bitartean. Mahaikideek koplen letra eta ohituraren azalpen testu bat agerian eduki zuten momentu oro festa ahalik eta ongien jarrai zezaten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
