euskalkultura.eus

Trenque Lauquen, Argentina. "Euskal Herriaren nortasuna islatzen duen ikur bat aukeratu nahi genuen eta horrekin lotuta jai erraldoi bat antolatu", kontatzen zioten iaz Trenque Launquengo Euskal Sustraiak Euskal Etxeko kideek EuskalKultura.com-i. Eta janari onak zerikusi handia duenez Euskal Herriko kulturarekin, 'Urdaiazpiko Jaia' egitea erabaki zuten, euskal erakundeko arduradunek berek azaltzen dutenez. Ideiak oso harrera ona izan zuen herrian eta joan den urtean 400 bat lagun bildu ziren proposamen berrian parte hartzeko.

Aurten, esperientzia arrakastatsua errepikatzeko nahian, Euskal Sustraiak-eko kideek prest dute dena Urdaiazpiko Jaiaren II. Ediziorako. Barrio Alegre kluba izango da aurten ere festaren egoitza eta urdaiazpikoak, txorizo zuri eta gorriak, txerri gaztak, behi gaztak, bondiolak, pancetak eta euskal etxeko andreek prestatutako haragi-bolek osatuko dute menua. Gainera, urtebete baino ez duen tradizioari jarraituz, zahatoa mahairik-mahai ibiliko da, gonbidatuek 'euren iaiotasuna' erakuts dezaten.

Ikuskizunik ere izango da Urdaiazpiko Jaian. Izan ere 'Las 3 estaciones jazz band' eta 'Los gigantes del ritmo' taldeek musika jarriko diote gauari. Beste alde batetik, eta biharamunean Amaren Eguna ospatzen denez Argentinan, zozketa batzuk egingo dira. Sarien artean, estimatuenak seguruenik, Argentina barruan edozein lekutara joateko bi bidaia suertatuko zaizkio irabazle zoriontsuari.