euskalkultura.eus

Newport, AEB. Rhode Island-eko Euskal Etxeak giro ederrean ospatu zuen iragan abuztuaren 25ean elkartearen Urteroko Piknika, Newporteko Colt State Park delakoan egin zen jaiarekin. Urtero legez haur eta nagusiek hainbat joko eta ekitaldiekin gozatzeko aukera izan zuten, horien artean, elkarteak urtero antolatzen dituen herri kirol erakustaldiak. 

[Aizkolaritza frogarako enborrak eta harrijasotzaileentzako harria deskargatzen (argazkiak RIEE)]

Aurten gonbidatu bereziak izan zituzten Rhode Islandeko euskaldunek: Gurea 2012 kultura lantegiak ematera bertara joan ziren Mayte Galardi eta Iñaki Goikoetxea, Euskal Herritarren eta Gizataldeen Zuzendaritzako bekadunak. Eguneko kirol ekintzetan parte hartzeaz gain, zenbait joko ere antolatu zituzten, eta biharamonean haurrentzako tailerrak egin zituzten Newporteko beste parke batean.

[Hementxe gaude! Giro bikainaz gozatu zuten Rhode Island Basque Club-eko bazkideek (argazkiak RIEE)]

[Euskal etxeko ume bat San Ferminei buruzko lantegian egin zituen panpinak erakusten (argazkia RIEE)]

"Rhode Island-eko euskal etxea Euskal Herriko koadrila bat bezalakoa da", azaldu diote bi bekadunek EuskalKultura.com-i. "Bazkide gehienak pilotari ohiak dira, Markinan eta Mutrikun sortutakoak, izan ere, 70-80ko hamarkadetan herri hauek ziren munduko jai alaiaren harrobiak. Denek adin berdintsua dute, 40 eta 50 urte bitartekoa, eta sasoiko daudela erakutsi zuten herri kirol probetan: txingak, harrijasotzeak, enbor mozteak...".

Euskal Etxeak ‘Honorary Member Award’, urteko ohorezko bazkide, izendatu zituen bi gazteak, euren lanarengatik esker-ona adierazteko.

[Mayte Galardi eta Iñaki Goikoetxea elkartearen 'Honorary Member Award' izendapena jaso zuten unean (argazkia RIEE)]

Argazki hauek eta gehiago, Rhode Island Basque Club euskal etxearen Facebook orrian, hemen.