euskalkultura.eus

Buenos Aires, Argentina. 'Florencio de Basaldua, euskal argentinarra' liburua maiatzaren 6an aurkeztu zen lehen aldikoz, Buenos Airesko Liburu Azokaren baitan. Alabaina, bertaratu ezin izan zutenek aukera berri bat izango dute Eusketxeren eskutik etzi asteazkenez. Kulktur ekitaldi baten barnean, Juan José Guarestik (ilobak) aurkeztuko du liburua Buenos Aireseko Mexiko kaleko euskal egoitzan. Horacio Reggini liburuaren egilea ere bertan izango da, hala nahi duenarentzat aleak sinatzeko prest.

Ekitaldia iluntzeko zazpietan hasiko da Aitor Alava Ekin Dantzari taldeko zuzendariak dantzatuko duen ohorezko aurreskuarekin. Ondoren, dantza talde osoak pieza batzuk dantzatuko ditu txistuaren laguntzaz. Jarraian, Euskaltzaleak-eko Abesbatzak, Eliseo Rodriguez gidari arituko da, Agur Jaunak eta Nerea izango zen abestiak interpretatuz. Ondoren, Alkartasunaren Otxoteak kantatuko du, Fernando Oliva zuzendari, El roble y el ombú, Boga Boga, Aurtxo Seaskan, Agur María eta Euzkotarrak kantuak, hain zuzen ere.

Kultur ekitaldia euskal afari batekin bukatuko da. Ekitaldi osoan parte hartzeko sarrera 30 pesotan eros daiteke. Erreserbak egiteko 4653-9073 telefonora deitzen ahal da, edo e-mailaren bidez hona idatzi: patriciaprensa@gmail.com

Eusketxeri laguntzeko bonoak

Azken bi urteetan egin legez, aurten ere 200 bono kaleratu ditu Eusketxek erakundearen 2009. urterako aurrekontua berdintzen saiatzeko. Bonoak erosten dituzten partaideek Euskal Herrira bidaiatzeko bi pertsonentzako sari baten zozketan parte hartzeko aukera edukiko dute --2010an gauzatzeko, hegazkineko klase ekonomikoa, denboraldi baxuan, edo bestela horren ordaina pesotan, hau da $ 8000--. Zozketa abenduan izango da, urte amaiera jaia.

Aurtengo uztailaren 31ra arte, bonoak $120 pesotan eros daitezke; edo, zatika ordainduz, bost hilabetez 30 pedo hilero ordainduz. Abuztuaren 1etik aurrera, berriz, 180 eso balioko du ordainketa bakarrean; edo zatika, 40 pesoko hilabeteroko bost ordainketa.  Argentinatik kanpo bizi direnentzat 30 eurotan finkatu da bonoaren prezioa. Parte hartu nahi dutenek --Eusketxerik lagunudz-- elkartearen egoitzan egin dezakete (México 1880, e/ Av. Entre Ríos y Combate de los Pozos, Buenos Aires). Informazio gehiago nahi duenak 011-4381-4611 telefonora deitu edota honako bi helbideetara idatz dezake: eusketxe@ciudad.com.ar; edo eusketxe@gmail.com.