euskalkultura.eus

Puerto Madryn, Argentina. Duela sei urte Maria Julia Ercorecak landatutako hazia landare sendo eta emankorra bihurtu da jende multzo baten lana eta engaiamenduari esker. Puerto Madryngo Etorritakoengatik euskal etxe bilakatuta, 2007an bilerak egiten hasi zen taldea gero eta leku garrantzitsuagoa doa irabazten hirian eta euskal komunitatean. Ibilbide labur honetan, proiektu anitz sortu dira euskal etxearen baitan, besteak beste hiriko ekitaldietan partaidetza handitzea, Euskal Aste Nazionaletara joatea edota egoitza propioa lortzea. Batzuk, epe luzerako asmo dira; beste batzuk, berriz, lehenago eskuragarriagoak. Edonola ere, euskal arbasoen kultura hedatzen jarraitzea da helmuga eta horretara doaz.

Ildo horri jarraituz, kideentzako bazkari bat antolatu zuen euskal etxeak joan den irailaren 15ean. Elkarretaratzea hiriko Medikuen Elkarteko aretoan burutu zen eta 80 bat lagun bildu zituen. Topaketaren baitan, euskal etxearen azken eta hurrengo nobedadeen berri eman zizkieten zuzendaritzakoek bildutako lagun eta bazkideei. Hona bazkariaren argazki-laburpena:

[Zenbait ekitalditan hartuko dute parte Puerto Madryngo euskal etxeko kideek datozen hilabeteetan. Irailaren 15eko bazkarian euren abileziak eta lanerako bildurrik eza erakutsi zuten Etorritakoengatik-ekoek; batzuek apaingarriak egiten; beste batzuek, berriz, sukaldean (argazkiaEE)]

[Kirola ez izan arren, txapelketak antolatu ohi dira ekintza honen inguruan. Eta iaioa izan behar da ondo egiteko, bai horixe! Zahatoa eskuz-esku ibili zen, emakume eta gizonen artea, helduen eta gazteen koadriletan (argazkiaEE)]

[Dantzariek sasoian behar dute egon datozen hitzorduetarako. Igandean, pieza batzuk prestatu zituzten bazkarirako. Hasteko, ‘Aurresku’ eskaini zioten helduen taldekoek elkarteko lehendakari Andy Elorriagari. Ondoren, ‘Fandango’ dantzatu zuten gazteek (argazkiaEE)]

[Dantza emanaldiarekin jarraitzeko, Txikiek ‘Txulalai’ aurkeztu zuten (argazkiaEE)]

[Jaia arratsaldean zehar luzatu zen, giro ezin hobean; eta ‘agur’ esan aurretik dantzari eta gonbidatuak ‘Polka’ batean nahastu ziren (argazkiaEE)]