euskalkultura.eus

Montevideo, Uruguai. FIVUko zuzendarietako batzuk buru-belarri dihardute euskara irakasleentzat antolatutako 'Euskara Munduan' programarekin, eta hala segitu dute aste honen hondarrean ekimen hori bukatu eta Argentina, Brasil, Kolonbia, Txile eta Uruguai bertatik etoritako ikasle/irakasleak euren etxeetara itzuli arte. Tarte handirik ezin izango dute hartu, ordea, datorren astean, hurrengo astean, otsailaren 4an, hasiko baita euren hurrengo ekimena: urtero bere parte diren euskal etxeetako gaztetxoentzat federazioak antolatzen duen Udaleku, aurtengoan seigarren ediziora iritsi dena.

Iragarritako datak otsailaren 4tik 7ra arte izaten segitzen du, baldin eta denborek --kronologiko zein klimatikoek-- bestelako eragozpen nagusirik ipintzen ez duten, hala gertatuz gero abisua berehala pasatuko litzatekeelarik. Udalekuk ziento erdi bat neska-mutiko bilduko ditu, aisialdia eta naturarekin eta udako proposamenekin zerikusia daukaten ekimenak euskal jokoekin eta euskal kultura lantzeko jolasekin nahasiz, beti ere uda giroa eta ongi pasatzeko lerro nagusien azpian.

Hau guztia FIVUk urtero Udaleku egin ohi duen lekuan gauzatuko da, Campamento Artigas delakoan alegia, Colonian, Rio de la Plata ertzean, neska-mutikoen adina 6-12 bitartekoa, nahiz eta 13-15 urteko gaztetxoak ere izango diren, begirale laguntzaile gisa "lidergoan urratsak eman eta ardurak hartzen joan daitezen", Enrique Poittevin FIVAko zuzendaritzakoak EuskalKultura.com-i adierazi dionez.