euskalkultura.eus

Flores, Uruguai. Dena gertu dago Uruguaien Floresko 3. Euskal Asteari hasiera emateko bihar bertan, Euskal Ardoaren eta Gastronomiaren Erakusketaren inaugurazioarekin. Bertara bilduko dira Uruguaiko, Argentinako eta Brasilgo 20 ardo upeltigitik gora, ekitaldiak aurten izango duen mailaren erakusle.

Erakusketan denetarik dastatzeko aukera izango da, besteak beste, Gustavo Burgos sukaldariak bertan zuzenean prestatuko duen paella, Colonia Suiza etxeko gaztak eta UTUko gastronomia ikastaroko ikasleek eginiko euskal pintxoak. Ekitaldiaren antolakuntza orokorra  Miguel Etchandy somelierraren esku egongo da.

Gastronomia izango da ardatz larunbatean ere, Konstituzio Plazan egingo den Paella Erraldoiari esker. Arratsaldeko 19:00tan hasiko dira paella prestatzen plazan eta, horrez gain, euskal janari eta edari postuak jarri eta dantza erakustaldiak egingo dira.

EGITARAUA

Euskal Astearen egitarauak honela jarraituko du:

Igandea 7

–9.30: 7 kilometrotako Maratoia Trinidad hirian.

Asteartea 9

–20.00: Plaza Mikrozinean, Floreseko euskaldunei buruzko hitzaldia emango du Hernan Sorhuet adituak. Sarrera doan. 

Asteazkena 10 eta osteguna 11

–19.00: “Polo Bessonart” pilota zirkuluan:
*Pilota txapelketa Uruguaiko Gazteen Selekzioko pilotariekin eta Euskal Etxeko pilotariekin. 
*Larruzko pilota desafioa Uruguaiko txapeldun Tourreilles-Fagalde eta panamerikar txapeldunorde Baldizan-Dufau bikoteen artean. Sarrera doan.

Igandea 14

–11.30: “Dr. Tabaré Regules” elkartean:

*Meza
*Arkume erreki txapelketa (dirusaria irabazten duen taldeak aukeratuko duen ongizate elkartearentzat).
*“Historia de los Vascos en el departamento de Flores” liburuaren aurkezpena. Floresko Euskal Etxeko kideek idatzi eta argitaratu dute lana.
*Kreol bazkaria.
*Kontzertua.
*Maratoiaren, pilota txapelketaren eta erreki txapelketaren sari banaketa.