euskalkultura.eus

Trinidad, Uruguai. Pelota Polo Bessonart Zirkuluan eginiko prentsaurrean iragarri zuten Floresko Euskal Etxeko arduradunek datorren apirilaren 2tik aurrera garatuko den Euskal Astearen berri. Egitarauak biltzen dituen proposamenak oro euskal jatorrizko biztanleentzat ezezik, bertako herritar guztientzat prestatu direla adierazi zuten joan den asteartean gauzatutako prentsaurrean.

Ekitaldien artean aipa daitezke Floresko departamentuko euskaldunen ondorengoen argazki eta objektuen erakusketa bat, Euskal Etxeko Celia Bessonart-ek azaldu zuenez, bertako euskal familientzat esanguratsuak eta adierazgarriak izan daitezkeen elementuak erakustearren.

Euskal gaiei buruzko hitzaldi sorta bat ere iragarri da.

Euskal Astearen baitan gauzatuko den beste ekimen bat  Ardoaren eta Euskal Gastronomiaren Floresko Lehenengo Aretoa izango da. Club Campestre delakoan egingo da, larunbatean, apirilaren 9an gauez, eta berau obratzeko BBVA bankoaren eta zenbait soto nazional eta atzerritarren lankidetza bilduko da. Antolatzaileen aldetik Alvaro Fagaldek esan zuenez, partaide kopuru mugatua daukan proposamena da hau, berak interesatuei euren partaidetza lehen bait lehen baieztatzea eskatzen zaie.

Euskal Etxea erreki lehiaketa bat ere ari da antolatzen. 'Pinchurro' Irazabalek azaldu zuenez, kasu honetan ekitaldia igandeaz, apirilaren 3an, egingo da, goizeko bederatzietatik aurrera Floresko Sustapen Elkartean, Sociedad de Fomenton, alegia. Horretarako harremanak hasiak dira bertako eakunde sozialetik, bakoitzak bere ordezkaritza bidal dezan.